«Квазимемлекеттік ұйымдар таза кірісінің 70 пайызы көлемінде ақша бөлу керек деген қаулы бар. Бірақ оның қорға қатысы жоқ. Қордың тікелей акционері – ҚР Үкіметі. Сондықтан түскен таза табыс дивиденд саясаты арқылы акционерге жолданады. Ол таза пайдадан емес, қордың бас кеңсесіне портфелдік компаниялардан келіп түскен дивидендтердің жартысынан төленеді. Сандар келтірсем: мәселен, біз өткен жылы 500 млрд теңге дивиденд жинасақ, соның 250 млрд теңгесін Үкіметке төлеуіміз қажет. Ал былтыр біз (Самұрық-Қазына қоры - авт.) 250 млрд емес, 302 млрд теңге дивиденд төледік. Яғни 50 пайыздың орнына 62 пайыз төледік. Осылайша, қор бекітілген дивиденд саясатын артығымен орындады», - деді баспасөз мәслихатында Kazinform тілшісінің сауалына жауап берген Мират Өтепов.
Еске салайық, таяуда Мәжіліс депутаты Мархабат Жайымбетов «Самұрық-Қазына» ұлттық әл-ауқат қорының мемлекетке аударатын қаражаты тым аз екенін мәлімдеп, депутаттық сауал жолдаған еді.
«2022 жылы «Самұрық-Қазына» ұлттық әл-ауқат қоры мемлекетке берілетін пайданың 70 пайызының орнына тек 10 пайызын ғана төлеген. Нақтырақ тоқталсақ, 1 триллион 629 млрд теңге таза табыстың 170 млрд теңгесін қайтарып отыр. Ал тапсырма бойынша, бюджетке 1 триллион 140 млрд теңге қайтару қажет еді. Яғни, 970 млрд теңге мемлекет қазынасына аударылмаған», - деді Мархабат Жайымбетов өз сауалында.