АСТАНА. KAZINFORM – Қазақстандық, 20 жастағы Сандуғаш Кенжебаева жұптық сында Мааньшань (Қытай) ITF W15 турнирінде үздік шықты.
Жарыстың 2-ракеткалары болып тіркелген қазақстандық теннисші ресейлік Софья Лансеремен бірге барлығы төрт кездесуін жеңіспен тәмамдады.
Қазақстандық-ресейлік жұп финалда доданың 1-ракеткалары, қытайлық Меики Куо – таиландтық Пеангтарн Плипуекпен чемпиондық атақ үшін таласты.
Бірінші партияда Кенжебаева – Лансере 6:3 есебімен басымдылық танытты.
Екіншісінде қытайлық-таиландтық дуэт қарымта қайырды – 6:3.
Супер тай-брейкте Сандуғаш пен Софья таразы басын аудара білді – 10:8.
Финалдық матч 1 сағат 14 минутқа созылды.
Сандуғаш Кенжебаева жұптық сында биыл жыл басында Түркиядағы осындай екі жарыста жеңімпаз атанған еді.
Еске сала кетейік, бұдан бұрын Сандуғаш Кенжебаеваның екінші рет Түркиядағы жарыстың чемпионы атанғанын жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).