Санкт-Петербургте теракт кезінде қаза тапқан Максим Арышевпен қоштасты

МӘСКЕУ-САНКТ-ПЕТЕРБУРГ. ҚазАқпарат - 3 сәуір күні метродағы лаңкестіктің салдарынан қаза тапқан Санкт-Петербург мемлекеттік экономикалық университетінің студенті - 22 жастағы қазақстандық Максим Арышевтің достары мен туыстары онымен қоштасу үшін «Сенная площадь» метро стансасына жиналды.

Максимнің ата-анасы Виталий мен Ирина Арышевтер қайғылы оқиға туралы қалай білгендіктері туралы айтты. «Күндіз сағат 2:28-де метроға баратындығы туралы СМС хабарлама жолдады. Ал достары біреуді күтетіндіктерін айтып, сыртта қалып қойған. Олар төменге түскен кезде, көк түтін басып қалып, дабыл іске қосылған. Біз Максимге қоңырау шалдық, алайда телефоны сөндірулі болды. Кейін теракті туралы қауырт желі көрсетілген хабарлама келіп түсті. Біз Ресей ТЖМ-ның қауырт желісіне қоңырау шалдық. Кейін консулдыққа хабарластық. Зардап шегушілердің тізімінде оның аты-жөні болмады. Кейін билет алып, Санкт-Петербургқа ұштық», - деді Ирина Арышева.

«Таңғы 7-де Санкт-Петербургке жеттік», - деп жалғастырды Максимнің әкесі - Виталий Арышев. «Бізбен Санкт-Петербургтағы Қазақстанның бас консулдығы хабарласты. Біз бұған дейін Бас консулдықтың жұмысынан бейхабар едік. Енді, Қазақстанның азаматы екендігімізді толықтай сезіндік. Олар үлкен жұмыс атқарды, себебі біз есеңгіреп не істерімізді білмей қалған болатынбыз», - деді Виталий Арышев.

 

«Максимнің лаңкестік әрекетке қатысы бар деп жалған ақпарат таратқан БАҚ-ты жауапқа тартасыз ба?» деген сауалға Максимнің анасы - Ирина ондай жұмыстармен айналысуға күш-қауқарының жоқтығын айтты.

Виталий Арышев бұған дейін жолыққан Санкт-Петербург мемлекеттік экономикалық университетінің басшылығы Максимге жала жапқан басылымды сотқа беруге ниетті екендігін және бұл шешімді өзінің қолдайтынын хабарлады.

 

Виталий мен Ирина Максиммен қоштасу рәсімінің қайда және қашан өтетін айта кетті. «Қазір біздің достарымыз бағдарлама жасап жатыр, біз оны міндетті түрде жариялаймыз. Себебі, онымен қоштасқысы келетіндер көп. Шамамен, таңғы 9-да шіркеуде (Санкт-Петербургта) діни рәсім жасалады. Кейін оны алып кетеді. Эйр-Астана мәйітті елге жеткізуге көмектеседі. Рейс кешкі 9-да. 7 сәуір күні Алматыға ұшып жетеміз, бізді күтіп алады. Достарымыз зал іздестіруде, себебі көптеген адамдар Максиммен қоштасқысы келеді. Жерлеу рәсімі өткеннен кейін күндіз сағат бірде қонақасы беріледі. Бастапқы бағдарлама осындай», - деп мәлім етті Ирина Арышева.  

 

Еске сала кетейік, 3 сәуір күні Санкт-Петербургта «Сенная площадь» және «Технологический институт-2» метро стансаларының аралығында теракт болып, салдарынан 14 адам қаза тапты және 50-ден астам адам жарақат алды.