Сәтбаев каналынан жіберілген су Павлодардағы шабындықтардың өнімділігін арттырды

ПАВЛОДАР. KAZINFORM — Шідерті өзенінің жайылым алқабындағы шабындықтардың өнімділігі гектарына 16 центнерден 19,3 центнерге дейін артқаны байқалып отыр.

ҚР Су ресурстары және ирригация министрлігінің ақпарынша, биыл «Қазсушардың» «Қ. Сәтбаев атындағы канал» филиалы экологиялық мақсатта 170,5 млн текше метр су жіберді. Оның ішінде 120 млн текше метрі Шідерті–Өлеңті табиғи аймағын сақтау және қалпына келтіру үшін Шідерті өзені арқылы бағытталды.

Бұл су Шідерті өзенінің жайылым алқабындағы шабындықтардың өнімділігін гектарына 16 центнерден 19,3 центнерге дейін арттыруға мүмкіндік берген.

— Шідерті өзеніне су жіберу Павлодар облысының экономикалық және экологиялық ахуалын едәуір жақсартты. Бұл мал азығын мол жинауға және балық шаруашылығы көлдерінің өнімділігін қалпына келтіруге септігін тигізді. Жыл сайын Қ. Сәтбаев атындағы каналдың суымен Шідерті өзенінің бойындағы 23 мың гектарға дейін жайылым мен шабындық суарылады, — деді «Қ. Сәтбаев атындағы канал» филиалы директоры Оңдасын Жиенқұлов.

Бұған дейін Сәтбаев атындағы каналды жаңғыртуға 12 млрд теңге бөлінгені туралы жазғанбыз7