РФ Прокуратурасы жанындағы Тергеу комитетінің бұқаралық ақпарат құралдармен байланыс басқармасынан хабарлағанындай, Ресей Федералдық қауіпсіздік қызметінің мамандары апат орнында ешқандай жарылғыштың ізін тапқан жоқ. Сот-медициналық сараптама тағайындалып, басқа да қажетті сот сараптамаларын белгілеу туралы мәселе шешілуде. Қылмыстық іс аясында оқиға орны тексеріліп, генераторлық турбинаның темір сынықтары мен бөлшектері, бейнебақылаудың 4 тіркегіші, кезекшілік бастығының журналы тәркіленді.
Істің мән-жайын анықтау үшін құрамына Тергеу комитетінің 12 тергеушісі мен криминалистері кірген тергеу тобы құрылып отыр.
Естеріңізге сала кетейік, дүйсенбі күні мәскеу уақыты бойынша сағат 04.15-те қатты соққының салдарынан (алдын-ала пайымдау бойынша, гидросоққыдан немесе май трансформаторының жарылуынан) Саян-Шушенск ГЭС-інің екі гидроагрегаты тас-талқан болды және машина залының ғимараты жартылай қирады. Сондай-ақ 7-інші және 9-ыншы агрегаттар қатты зақымданған, ал 3-інші, 4-інші және 5-інші агрегаттар машина залы ғимаратының металл-конструкциялық жабындарымен басып қалынған.
РФ Төтенше жағдайлар министрлігі Сібір аймақтық орталығының мәліметтері бойынша, апат салдарынан 12 адам қаза болған, 15 адам жарақат алған, 50-ден астам адам - із-түзсіз жоғалғандар санатында (басқа мәліметтер бойынша, 14 адам жараланған, 64 адам із-түзсіз жоғалған). Апаттық факті бойынша РФ Қылмыстық кодексінің 143-ші бабына сәйкес (еңбекті қорғау ережелерін бұзу) қылмыстық іс қозғалды.