«Ел Президентінің тапсырмасы бойынша саяси қуғын-сүргін құрбандарын толық ақтау жөніндегі мемлекеттік комиссия құрылды. Осындай комиссиялар өңірлерде құрылған. Бұл консультативтік-кеңесші орган. Бүгін біз іс-қимыл жоспарын талқылаймыз. Біздің облыс аумағында ГУЛАГ жүйесінің еңбекпен түзетуге арналған бірнеше лагерь, соның ішінде ең ірісі Карлаг орналасқан. Біз жазықсыз қуғын-сүргінге ұшырағандар туралы естеліктерге құрмет білдіруіміз керек. Сол жылдары көптеген халықтар, соның ішінде қазақтар да зиялы қауымның басым бөлігінен айырылды. Болашақ үшін есте сақтау және тарихи әділеттілікті қалпына келтіру – біздің азаматтық парызымыз», - деді облыс әкімінің орынбасары Абзал Нүкенов.
Өңірлік комиссияға 28 адам – мемлекеттік және құқық қорғау органдарының өкілдері, қоғам қайраткерлері мен ғалымдар кірді. Төраға болып Абзал Нүкенов тағайындалды. Оның орынбасары Карлаг тарихын зерттеумен көп жылдан бері айналысып келе жатқан академик Е.А. Бөкетов атындағы Қарағанды университетінің ректоры Нұрлан Дулатбеков болды.
Комиссия мүшелері арасында тарихшы, «Тұлғатану» ғылыми-зерттеу орталығының директоры Нұрсахан Бейсенбекова, «Алаш» партиясының негізін қалаушылардың бірі, қазақ қайраткері Әлімхан Ермековтің немересі Олег Ермеков, этнобірлестіктердің басшылары, облыстық ҚХА мүшелері Увайс Джанаев, Вилен Молотов-Лучанский, Виталий Тварионас, танымал бизнесмен Ерлан Әшім бар.
«Комиссияның міндеті саяси қуғын-сүргін құрбандарын толық оңалту ғана емес, тарихты бағалау, материалдарды жинау және талдау. Университетте біз Қазақстандағы ашаршылық туралы зерттеу жобасын бастадық. Оған ғалымдар мен студенттер қатысады.
Қарағанды облысында қуғын-сүргінге ұшырағандарды жаппай жерлеу картасын жасау көзделіп отыр. Отырыста архивтерді толық құпиясыздандыру қажеттілігі туралы айтылды», - деп атап өтті Нұрлан Дулатбеков.
Ақталуы тиіс адамдардың нақты саны белгісіз. Облыстық прокуратураның мәліметінше, 2019-2020 жылдары 311 өтініш түскен. Жағдайлардың жартысында өтініш берушілер саяси қуғын-сүргін құрбандары немесе зардап шеккендер деп танылды.
Естеріңізге сала кетейік, 2020 жылғы 24 қарашада Мемлекет басшысы Қасым-Жомарт Тоқаев «Саяси қуғын-сүргін құрбандарын толық оңалту жөніндегі мемлекеттік комиссия туралы» Жарлыққа қол қойды.