Семейде ірі сауда үйіндегі өрт сөндірілді
СЕМЕЙ. KAZINFORM – Семей қаласында ірі сауда үйіндегі қызыл жалын толықтай өшірілді.
Қаладағы киім-кешек саудаланатын ең ірі сауда орнында 6 желтоқсанда таңғы сағат 3.00 шамасында өрт шыққан еді. Өрт сөндірушілер 2 минутта оқиға орнына жеткен кезде бірінші қабатта сауда бутиктері жанып жатты. Қас қағымда өрт 2-ші қабат пен шатырға таралып кеткен.
«Ғимарат ішіндегі қою түтін мен ыстық температура, жанғыш материалдардың көптігі және ғимарат құрылысының күрделі болуы салдарынан өрт тез таралып, оны сөндіру жұмыстары қиындады. Тілсіз жаумен күрес барысында 3-ші қабаттың шатыры ішінара құлады», - деп хабарлады Абай облыстық Төтенше жағдайлар департаментінен.
Қалалық Мәдениет үйінде ТЖД және Денсаулық сақтау басқармасының психологтары кәсіпкерлермен жұмыс жүргізді. Барлығы 200-ден астам кәсіпкерге шұғыл-психологиялық көмек көрсетілді.
«Өртті сөндіруге ТЖ және Полиция департаменттерінен, апаттар медицинасы орталығынан, ТЖМ 68303 әскери бөлімінен, «ҚТЖ» ҰК» АҚ, Ұлттық ұланның 5511 әскери бөлімінен, «Зеленстрой» ЖШС-нен 487 адам, 46 техника және 1 өрт сөндіру пойызы жұмылдырылды. Қызыл жалын сағат 20.55-те толықтай өшірілді. Оттың шығу себебі анықталып жатыр», - делінген ақпаратта.
Қазіргі уақытта өрт орнын қарауылдау, су төгу және қоршау үшін жеке құрамнан 264 адам мен 31 техника тартылған.