Сенат 2017-2019 жылдардың республикалық бюджет жобасын түзетулерімен Мәжіліске қайтарды

АСТАНА. ҚазАқпарат - Бүгін Сенаттың жалпы отырысында «Қазақстан Республикасының Ұлттық қорынан 2017-2019 жылдарға арналған кепілдендірілген трансферт туралы», «2017-2019 жылдарға арналған республикалық бюджет туралы», «Республикалық және облыстық бюджеттер, руспубликалық маңызы бар қала, астана бюджеттері арасындағы 2017-2019 жылдарға арналған жалпы сипаттағы трансферттердің көлемі туралы» заң жобалары қаралды. Соңғы екі құжатқа бірқатар түзетулер жасалғандықтан, заң жобалары Мәжіліске қайтарылды, деп хабарлайды ҚазАқпарат.

Заң жобасын таныстыру барысында ҚР Ұлттық экономика министрі Қуандық Бишімбаев республикалық бюджеттің кірістері (трансферттерді есепке алмағанда) 2017 жылы 4,3 трлн. теңге, 2018 жылы 4,5 трлн.теңге, 2019 жылы 4,8 трлн. теңге сомасында болжанып отырғандығын атап өтті. Ал, 2017 жылы республикалық бюджет шығыстары 8,5 трлн. теңге, 2018 жылы 8,3 трлн. теңге және 2019 жылы 8,7 трлн. теңге көлемінде қарастырылып отыр.

Заң жобасы бойынша жұмыс барысында сенаторлар бірқатар өзгерістер мен толықтырулар енгізді.

Атап айтқанда, өзгертулер өңірлік мәселелерді шешуге негізделіп отыр. Осы ретте Шығыс Қазақстан, Павлодар облыстарында сумен жабдықтау, су бұру саласындағы жобаларды қаржыландыруға бағытталған.

Сонымен қатар Павлодар, Атырау, Солтүстік Қазақстан облыстарында көлік саласында, оның ішінде автомобиль жолдарын реконструкциялауға; Батыс Қазақстан облысының елді мекендерін газдандыруға негізделген жобаларды қаржыландыру көзделіп отыр.

Бұдан басқа, ЭКСПО-2017 әдеби Биенналені, «Оқитын ұлт - Ұлы Дала елінің болашағы» халықаралық симпозиумын өткізуге арналған, сондай-ақ «Астана» халықаралық қаржы орталығының органдарын дамытуға және ұстауға бағытталған шығыстарды ұлғайту қолдау тапты.

Аталған жобаларды іске асыруға Үкімет резервінен 2017 жылы 26,1 млрд. теңге, 2018 жылы 16,8 млрд. теңге, 2019 жылы 10,1 млрд. теңге қосымша бөлінді. Талқылаулардан кейін құжатқа енгізілген бірқатар өзгерістермен үш жылдық бюджет жобасын Мәжіліске жіберу шешімі қабылданды.