Сенат республикалық бюджетке түзетулерді қабылдады
Жоғарғы Палата «Қазақстан Республикасының Ұлттық қорынан 2016-2018 жылдарға арналған кепілдендірілген трансферт туралы» заңға өзгеріс енгізу туралы» заңға түзетуді қабылдады.
2016 жылғы бюджетке кірістер түсімі асыра орындалу ықтималдығын ескере отырып және Ұлттық қор қаржысын үнемдеу мақсатында Ұлттық қордан республикалық бюджетке кепілдендірілген трансферт көлемін 2 880,0 миллиард теңгеден 2 479,7 миллиард теңгеге дейін азайту көзделіп отыр.
Сенаторлар сондай-ақ «2016 - 2018 жылдарға арналған республикалық бюджет туралы» заңға өзгерістер мен толықтыруларды да бекітті.
Макроэкономикалық көрсеткіштерді нақтылау және 2016 жылғы алты айдағы іс жүзіндегі түсімдерді есептеу республикалық бюджет кірістерін қайта қарауға негіз болды.
Республикалық бюджетке кірістердің нақты болжамы (трансферттер түсімін қоспағанда) 2016 жылы 4 200,2 миллиард теңге сомасында белгіленді немесе 834,9 миллиард теңгеге ұлғайды.
Республикалық бюджет шығыстары 2016 жылы нақтыланған бюджетпен салыстырғанда 379,9 миллиард теңге өсімімен 8 646,7 миллиард теңге сомасында көзделіп отыр. Экономикалық өсуді ынталандыру шараларын іске асыруға - 283,4 миллиард теңге, еліміздің қауіпсіздік деңгейін көтеруге - 70,2 миллиард теңге және түрлі жобалар бойынша міндеттемелері орындауға - 136,4 миллиард теңге бюджеттен қосымша бөлінетін болады.
Республикалық бюджеттің дефициті 2016 жылы бұрынғы деңгейде қалады және ол 902,7 миллиард теңгені немесе Жалпы ішкі өнімнің 2 пайызын құрайды.
Сенаторлар Серік Біләлов, Сергей Ершов, Манап Көбенов, Дулат Құсдәулетов, Бірғаным Әйтімова, Сәрсенбай Еңсегенов, Әли Бектаев, Серік Жақсыбеков, Жеңіс Нұрғалиев және Елеусін Сағындықов Үкімет мүшелері мен Ұлттық банкінің басшылығына сауалдар қойды, сондай-ақ бюджет үдерістерін жетілдіру жөніндегі өз ескертпелері мен ұсыныстарын айтты. Премьер-министрдің орынбасары - ауыл шаруашылығы министрі Асқар Мырзахметов, ұлттық экономика министрі Қуандық Бишімбаев, қаржы министрі Бақыт Сұлтанов, Ұлттық Банкі Төрағасының міндетін атқарушы Олег Смоляков, ішкі істер министрі Қалмұханбет Қасымов қажетті түсіндірме берді.
«Бүгінгі қабылданған заңдар еліміздің әлеуметтік-экономикалық дамуына, халықтың әл-ауқатын жақсартуға оң әсерін тигізеді, - деді Төраға Қ.Тоқаев. - Үкімет алдағы уақытта заңдарға енгізілген өзгерістерге сәйкес тиісті шараларды орындайды және депутаттар айтқан ұсыныстарды ескереді деп біз сенеміз».
Отырыс барысында сенатор С.Ақылбай салық және кеден органдарының төменгі құрылымдарындағы қызметкерлердің еңбекақысына байланысты мәселелер бойынша еліміздің премьер-министрінің атына депутаттық сауал жолдады.