Сенат Төрағасының орынбасары Иран компанияларын «ЭКСПО-2017» халықаралық көрмесіне қатысуға шақырды
Б.Бекназаров Қазақстан мен Иран ынтымақтастығының жоғары деңгейіне қанағаттанатынын білдірді. Ол Қазақстан Президенті Н.Назарбаевтың осы жылдың сәуір айындағы Иранға барған ресми сапары екі елдің халықаралық және аймақтық мәселелерде көзқарастары ортақ екенін көрсетті деп атап өтті.
Парламентаралық үнқатысудың келешегін талқылай келіп, тараптар екі жақты ынтымақтастықты өрістету қажеттігіне тоқталды.
Төраға орынбасары Қазақстанның 2017-2018 жылдардағы БҰҰ Қауіпсіздік Кеңесінің тұрақты емес мүшесі лауазымындағы басымдықтары туралы әңгімеледі, сондай-ақ Астанада Азық-түлік қауіпсіздігі жөніндегі ислам ұйымын құру туралы Қазақстанның бастамасына Иран тарапының қолдау білдіргені үшін ризашылылығын білдірді. «Ұйымның басты міндеті - бірлескен азық-түлік қорларын қалыптастыру және басқару есебінен азық-түлікті жеткізу шығындарын азайтуға мүмкіндік беретін мейлінше тиімді көлік-логистикалық бағдарларды құрып, ислам мемлекеттері халқын табиғи-климаттық және географиялық жағдайға байланысты экономикалық тұрғыда қол жетімді азық-түлікпен қамтамасыз етуді шешуіне сенім артамыз», - деді Б.Бекназаров.
Кездесу соңында Сенат Төрағасының орынбасары Иран компанияларын «ЭКСПО-2017» халықаралық көрмесіне қатысуға шақырды.