Сейсможаттығу: алматылықтардың ұялы телефондарына шұғыл хабарлама келді
АЛМАТЫ. KAZINFORM – Алматыда сағат 11:00–де сирена дыбыстары іске қосылды.
Қала тұрғындары жалпықалалық сейсмикалық жаттығулар өткізу туралы шұғыл хабарлама алды. Оның ішінде сиреналық-дауыс хабарлау құрылғылары іске қосылды, мобильді қосымшалар арқылы хабарламалар жіберілді.
Алматы қаласы ТЖД мәліметіне сәйкес, мегаполис 9-10 балдық сейсмикалық аймақта орналасқан, сондықтан әрбір азамат төтенше жағдай кезіндегі және одан кейінгі іс-қимылдарға дайын болуы керек.
Атап айтқанда:
— Жер дүмпуі бола қалған жағдайда отбасы мүшелерімен кездесетін орынды алдын ала анықтау қажет.
— Жер сілкінісі аяқталғанын күту үшін пәтер не үйдегі ең қауіпсіз жерлерді алдын ала анықтау қажет.
— Ғимараттан эвакуациялаудың ең қысқа жолын анықтап, біліп жүру керек.
Еске салайық, 28 сәуірден бастап теле-радиоарналарда жоспарлы жаттығу туралы бейнероликтер мен сабыр сақтауға шақыратын хабарламалар көрсетілді.