«Шаңырақ күні» Қастеев мұражайында экскурсия өтті
АЛМАТЫ. KAZINFORM – 17 наурызда Қазақстанда Наурыз мерекесінің төртінші күні тойланып жатыр. Шаңырақ күні - қазақстандықтар үшін маңызды саналатын отбасы құндылықтарына арналған. Мереке құрметіне орай Алматыдағы Ә.Қастеев атындағы мұражайда экскурсия өтті. Іс-шараға «Арыстан» мамандандырылған лицейінің оқушылары қатысты. Олар мұражай қызметкерлерін мұқият тыңдады.
Экспозицияда шаңырақтың өзі, XIX және ХХ ғасырлардағы өнер туындылары, сондай-ақ қазіргі заманғы суретшілердің, қолөнершілердің еңбектері ұсынылды.
«Наурызнаманың онкүндігі аясында бүгін экскурсия отбасылық құндылықтар күніне арналған. Қолданбалы өнер Қазақстан халқының дәстүрлері мен мәдени мұрасын бейнелейді. Біздің жастар мен болашақ ұрпақ шаңырақтың не екенін білуі керек. Көрме аясында оннан астам гобелен, ұлттық стильдегі зергерлік бұйымдар, киіз, былғары бұйымдар, кесте тігу, тоқу, ағаштан жасалған бұйымдар ұсынылған», - деді мұражай педагогикасы және экскурсия бюросының жетекшісі Гүлнар Жуваниязова.
Іс-шара барысында мұражай қызметкерлері киіз үйдің негізгі бөліктерінің бірі – шаңырақ туралы қызықты ақпараттармен бөлісті, сондай-ақ ұлттық өнер бұйымдарын жасау дәстүрлері мен технологиялары туралы егжей-тегжейлі айтып берді.
«Шаңырақ – біздің тірегіміз. Жалпы киіз үй – бұл ежелгі дәуірден келе жатқан көшпенділердің дүниетанымы. Шаңырақ киелі мағынаға ие, шексіздікті, мәңгілікті бейнелейді, ол түркі халықтары үшін киіз үйдің сындарлы элементі ғана емес, сонымен қатар көптеген наным мен ғұрыппен ұштасқан қасиетті нысан. Бұл қасиетті мағына оны қазақтар үшін ерекше етеді. Шаңырақ үйді, үй ошағын және рудың жалғасын бейнелейді, бұл оның қазіргі Қазақстанның Елтаңбасында болуын түсіндіреді. Шаңырақ ұрпақтан-ұрпаққа жалғасып келе жатқан отбасылық жәдігер болды және оның маңызы әсіресе әкесіне тиесілі қара шаңыраққа-шаңыраққа құрметпен қарайтын ұлдары үшін өте маңызды болды. Қазақтар шаңыраққа қарап маңызды ант берді», - деді экскурсия өткізуші Шолпан Нұғыманова.
Айта кетейік, мүмкіндігі шектеулі адамдар үшін өнермен танысудың тактильді әдісі қарастырылған, «Жанасу» шағын экспозициясы жасалған, экспонаттарды қолмен ұстауға болады.