Шаруалар назардан тыс қалмайды - Өмірзақ Шөкеев
Сайрам ауданына арнайы жұмыс сапарымен келіп, диқандардың тыныс-тіршілігімен танысты. Аймақ басшысымен жүздескен шаруа қожалықтары мен жылыжайлардың иелері өз мәселесін ортаға салды. Өмірзақ Естайұлы өтпелі кезеңнің қиындықтарына төтеп беріп, алаңдамауға шақырды. Керісінше, жұмысты күшейтуді тапсырды.
«Шаруалар назардан тыс қалмайды. Елдегі төтенше жағдайға байланысты ауыл шаруашылығы саласының ақсауына жол берілмейді. Керісінше, қайта жұмысты күшейту қажет. Мемлекет тарапынан қолдау көрсетіледі. Қосымша қажеттіліктер туындап жатса, қарастырылады. Бұл кезең отандық өнім көлемін арттыруға үлкен мүмкіндік. Облыста азық-түлік қоры жеткілікті, бағаларды негізсіз өсіруге жол берілмейді», - деді облыс әкімі.
Ауыл шаруашылығы өнімдерімен толық қамтамасыз ету мақсатында шаруа қожалық иелері егістік жерден екі-үш рет өнім алуды тоқтатпаймыз деп отыр. Аудандағы бірнеше шаруа қожалықтардың жұмысымен танысқан Түркістан облысының әкімі Өмірзақ Шөкеев сайрамдықтардың еңбекқорлығын құп көрді.
Әр ауыл округінен ауыл шаруашылығы саласында алдыңғы қатарлы технологияларды қолдана отырып, жылына бірнеше рет өнім алатын тауар өндірушілер тізімі бекітілген. Бүгінде 100-ден астам шаруашылық 145,8 га егістік алқапта егін еккен. Атап айтқанда, картоп, қырыққабат, сәбіз, пияз, сарымсақ, нохат, қияр мен тәтті бұрыш егілді. Ауданда 100-ден астам шағын және ірі жылыжайларлар тынымсыз жұмыс істейді.