АСТАНА. ҚазАқпарат - Шайбалы хоккейден 2024 жылғы әлем чемпионатында құрамалардың топтарға бөлінуі нақтыланды. Қазақстан құрамасы сынға түсетін А тобында Канаданы АҚШ құрамасы алмастырды, деп хабарлайды ҚазАқпарат тілшісі.
Әлемдік дода 2024 жылдың 10- 26 мамыры аралығында Чехияның Прага және Острава қалаларында өткізіледі.
Әлем чемпионатында А тобында (Острава) АҚШ, Германия,
Швеция, Словакия, Латвия, Франция, Қазақстан, Польша құрамалары сынға түседі.
Ал В тобында (Прага) Финляндия, Канада, Швейцария, Чехия, Дания, Норвегия, Австрия мен Ұлыбритания шеберлік байқасады.
2023 жылғы әлем чемпионаты аяқталғаннан кейін Халықаралық шайбалы хоккей федерациясы (ИИХФ) 2024 жылғы әлем чемпионатының топтық кезеңдегі алдын ала нұсқасын жариялаған еді. Соңғы нұсқасында АҚШ пен Канада орын алмасты, басқа өзгеріс жоқ.
Айта кетсек, 2023 жылғы әлем чемпионатында Канада жеңімпаз тұғырына көтерілсе, Германия екінші орын алды. Үздік үштікті Латвия құрамасы түйіндеді.
Әділжан Үмбет
1996 жылы Әл-Фараби атындағы Қазақ мемлекеттік ұлттық университетінің журналистика факультетін тәмамдаған. Еңбек жолын 1996 жылы Алматы қалалық «Алматы ақшамы» газетінде бастады. Одан кейін жылдарда Қорқыт ата атындағы Қызылорда мемлекеттік университетінде, «Ақмешіт ақшамы», «Сыр бойы» газеттерінде қызмет атқарып келеді.
2015-2020 жылдарда «Ақмешіт апталығы» газетінің бас редакторы болды.
Негізгі қызметімен қосып 2006-2014 жылдарда республикалық «Жас Қазақ», «Алаш айнасы» газеттерінің Қызылорда облысындағы меншікті тілшісі болып еңбек етті.
2018 жылдан бері «Kazinform» ақпарат агенттігінде Қызылорда облысындағы меншікті тілші.