Шекарашылар ашық теңізге ағып кеткен балықшыларды құтқарды

АСТАНА. ҚазАқпарат - Кеше сағат 11.00 шамасында Шекара қызметінің «Жағалау күзеті» өңірлік басқармасына Төтенше жағдайлар министрлігінің жергілікті департаментінен шұғыл ақпарат келіп түсті. Онда Ақтау порты маңында, дәлірек айтқанда «Алтын құм» демалыс аймағында резина қайықта отырған екі балықшыны қатты жел ашық теңізге қарай әкетіп бара жатқандығы туралы мәлім етілді. Бұл туралы ҚР ҰҚК ШҚ баспасөз қызметі хабарлады.

Хабарды алысымен өңірлік басқарманың бастығы І рангілі капитан Қадыржан Мұқанов «Сардар» шекаралық кемесіне көмекке шығу туралы пәрмен берді. Шұғыл түрде жолға шыққан кеме, арада 50 минут өткенде жағалаудан 6 миль қашықтықта, яғни Ақтау портынан оңтүстікке қарай теңіздің асау толқынына шайқалып тұрған жүзу құралын, ондағы адамдарды анықтады. Жеке құрам тез арада зардап шегушілерді және олардың қайығын кеме бортына көтеріп алды.

«Тез арада көрсетілген көмектері үшін балықшылар шекарашыларға өз алғыстарын білдірді, оның ішінде теңіз сақшылары тек шекараны қорғап қана қоймай, сонымен бірге суда зардап шеккен азаматтарға да көмек қолын соза білетіндіктерін айрықша атап өтті», делінген хабарламада.