***
Елдегі саяси тұрақтылықтың басты факторларының бірі Қазақстан халқы Ассамблеясы екендігі жақсы мәлім. Бүгін Астанадағы Бейбітшілік және келісім сарайында Қазақстан халқы Ассамблеясының «Қазақстан жолы: тұрақтылық, бірлік, жаңғыру» тақырыбындағы ХІХ сессиясы өткізіледі. Осы алқалы жиын қарсаңында, кеше «Егемен Қазақстан» газеті Ассамблея мүшелерінің бір тобының қатысуымен дөңгелек үстел басындағы әңгіме өткізді. Осы жайт арқау болған мақала басылымда «Бәріміз біргеміз, сондықтан берік іргеміз» деген тақырыппен жарияланды. Жиын барысында сөз алған «Вайнах» Алматы облыстық чешен-ингуш қоғамдық-мәдени бірлестігінің құрметті төрағасы Атсалим Идигов: «Ұлтым шешен болса да, мен өзімді нағыз қазақпын деп санаймын. Өйткені, менің туып-өскен жерім - Қазақстан. Бізде кейбіреулер «бірінші Отаным, екінші Отаным» деп айтуға құмар. Ол, меніңше, дұрыс емес. Отан деген адамның өзі туып-өскен жері. Осылай айтатын болсақ, біздің бәріміздің Отанымыз қазақтың қасиетті жері - Қазақстан. Одан басқа Отан бізде жоқ», - дейді.
***
«Алаш айнасы» газетінің тұрақты «Дат!» айдарында академик Әбдімәлік Нысанбаевпен арадағы сұхбат «Ұлт руханияты мен мәдениеті, игілігі үшін еңбектенген адам өмірден шаршамайды» деген тақырыппен берілген. Басылым тілшісінің барлық сауалдарына тұщымды жауап берген академик. «Халық жадында жаңғырып, оның күнделікті өмірімен астасып, сабақтасып отырмайтын тарих - өлі тарих. Жансыз тарих жер бетінен жоғалған халықтарда ғана болады. бұрын қазақ елінің тарихы, қазақ халқының жүріп өткен ұлы тарихи жолы құр деректер тізбегі түрінде самарқау баяндалып келсе, бүгінгі талап басқа. Біз осы тарихымызды ұлттық және стратегиялық мүдде тұрғысынан халқымыздың ізгілікке, елдікке ұмтылуының үздіксіз саяси процесс ретіндегі, ұлт-азаттық күрес түріндегі қасіретінен сабақ алып, қайта жазып шығуымыз керек», - дейді.
***
«Айқын» газетінің жазуынша, Мемлекеттік басқару академиясының білім алушылары болашақта бүкіләлемдік білім беру бағдарламасы негізінде оқытылады. Бұл туралы кеше Президент жанындағы Мемлекеттік басқару академиясында өткен жас ғалымдар, докторанттар мен магистранттардың ғылыми-тәжірибелік конференциясында айтылған. «Демек, шенеуніктеріміз шікіреймейтін болады. Өйткені шетелдегі шенеуніктер қашанда сыпайы, сіз деп сызылып тұрады. Ал бізде ше? Мемлекеттік қызметтегі орта буын кадрлардың өз өздерін жарты әлемнің билеушісіндей сезінеді. Сұрағыңызға жауап беруге ерінеді», - деп жазады басылым. Мақала «Шенеуніктер шікіреймейтін болады» деген тақырыппен берілген.
***
«Казахстанская правда» газетінің жазуынша, кеше Мемлекет басшысы Нұрсұлтан Назарбаев «Шеврон» компаниясының басшылығын қабылдады. Қазақстан Президенті еліміз үшін өте қиын жылдары Қазақстанға келген «Шеврон» компаниясымен табысты ынтымақтастық орнағанын атап өтті. «Біз өндіру көлемін одан әрі ұлғайту ниетінде болуымыз керек. Сонымен қатар, компания қазақстандық мазмұнмен айналысуда, жұмысшылардың 80 пайызы Қазақстан азаматтары. Сіздердің тапсырыстарыңыздың арқасында отандық кәсіпорындарда жаңа жұмыс орындары ашылуда. Қазіргі уақытта Қазақстанда маңызы үлкен индустриялық-инновациялық даму бағдарламасы іске асырылуда. Біз үш ірі мұнай нысаны - Теңіз, Қашаған және Қарашығанақ кәсіпорындар құру, өз кен орындарында қызмет көрсету үшін осы бағдарламаға белсенді қатысуы тиіс деп есептейміз», - деді Н.Назарбаев.