Шетелдік БАҚ-тағы Қазақстан: Мұнай экспортының өсімі және Парсы шығанағы елдерімен ынтымақтастық
Қазақстан Парсы шығанағы елдері үшін визасыз режим енгізеді - Zawya
20 шілдеде Zawya басылымы Орталық Азия елдері мен Парсы шығанағы ынтымақтастық кеңесі (GCC) саммиті туралы мақала жариялады.
Мақалада Қазақстан президенті Қасым-Жомарт Тоқаевтың «Қазақстанның тұрақты өсу мен өркендеуді қамтамасыз ету үшін Парсы шығанағы Ынтымақтастық кеңесі елдері үшін визасыз кіру жүйесін енгізгені» туралы жазылған.
«Қазақстан Президенті туризм индустриясы өңір экономикасының қарқынды дамып келе жатқан салаларының бірі екенін атап өтіп, мәдени-танымдық, экологиялық, спорттық және коммерциялық туризмді өзара ілгерілетуді дамытуға дайын екенін білдірді», - делінген мақалада.
Орталық Азия мен Парсы шығанағы елдері екіжақты экономикалық байланысты нығайтады - Al Arabiya
Al Arabiya ақпарат агенттігі Сауд Арабиясының Инвестиция министрі Халид бен Абдулазиз әл-Фалих 18-19 шілдесінде Жидда қаласында өткен Парсы шығанағы Ынтымақтастық Кеңесі мен Орталық Азия елдері саммитінің нәтижесінде екіжақты қарым-қатынастарды нығайту, экономикалық өсуді қамтамасыз ету және инвестиция көлемін арттыру перспективаларына оптимистік көзқараспен қарайтыны туралы жазды.
Жиддадағы саммитке Парсы шығанағының алты елінен, сондай-ақ Қазақстан, Өзбекстан, Түркіменстан, Тәжікстан және Қырғызстанның ресми өкілдері қатысты.
«Сауд Арабиясының Орталық Азияға салған негізгі инвестицияларына тоқталған әл-Фалих Корольдік Орталық Азия елдерінен Сауд Арабиясына инвестиция көлемін ұлғайтуға және әртараптандыруға ұмтылып отырғанын айтты», - деп хабарлайды Al Arabiya.
Қазақстан Әзербайжан арқылы мұнай экспортын арттырды - Caspiannews
Caspiannews басылымы Қазақстанның әртараптандыру стратегиясының бір бөлігі ретінде Әзербайжан арқылы шикі мұнай экспортын ұлғайтып жатқаны туралы мақала жариялады.
«Елдегі ең ірі мұнай тасымалдаушысы «ҚазТрансОйл» сәуір-маусым айларында Әзербайжан арқылы еуропалық нарыққа қазақстандық мұнай ағыны артқанын хабарлады. Теңіз кен орнынан Баку-Тбилиси-Джейхан мұнай құбыры арқылы Қазақстан мұнайының ағыны ағымдағы жылдың екінші тоқсанында 347,1 мың тоннаға жетті. Бұл бірінші тоқсанмен салыстырғанда 18 есе көп», - делінген мақалада.
Әзербайжандық SOCAR мен Қазақстанның ұлттық энергетикалық компаниясы «ҚазМұнайГаз» арасында бұрын қол қойылған бас келісім аясында қазақстандық мұнайды Әзербайжан арқылы Еуропа нарығына экспорттау үшін тасымалдау көлемі артқан. Құжатта Теңіз кенішінен Баку-Тбилиси-Джейхан мұнай құбыры арқылы жыл сайын 1,5 миллион тонна мұнай тасымалдау көзделген.
2022 жылы Қазақстан Президенті Қасым-Жомарт Тоқаев Орталық Азия мен Оңтүстік Кавказды қамтитын Қытайдан Еуропаға дейін созылып жатқан «Орталық дәліз» деп аталатын Транскаспий халықаралық көлік бағытының әлеуетін толық пайдаланудың маңыздылығын атап өтті. Орта дәліз Еуропа мен Азия арасындағы негізгі сауда жолына айналды, бұл аймақтың теңізге шыға алмайтын елдері үшін үлкен экономикалық пайда мен жылдамырақ транзиттік уақытты ұсынады.
Қазақстанда теңіз жүк тасымалының көлемі өсті - Trend.az
Trend басылымы 21 шілдеде Қазақстанның теңіз көлігі 2023 жылдың қаңтар-маусым айлары аралығында 633 200 тонна жүк тасымалдағаны туралы хабарлады.
«Елдің Ұлттық статистикалық бюросының мәліметі бойынша, өткен жылдың сәйкес кезеңімен салыстырғанда теңізде жүк тасымалдау көрсеткіші 13,5%-ға артқан. Сонымен қатар, жалпы жүк айналымы да өткен жылмен салыстырғанда 0,6%-ға аздап өсіп, 381,8 млн тоннаны құрады», - деп жазды.
Сонымен қатар, мақалада Қазақстанның ішкі теңіз көлігінде айтарлықтай өсім байқалып, 2022 жылдың сәйкес кезеңімен салыстырғанда жүк тасымалы 3,6%-ға өскені айтылған. Су жолдарымен 264 мың тонна жүк тасымалданған. Ішкі су көлігіндегі жолаушылар тасымалы да 1,5 есе өсіп, 53 мың жолаушыны құраған.
Қазақстан Шанхай Ынтымақтастық Ұйымы үшін реформалар бағдарламасын анықтады - EurasiaNet
Eurasianet басылымы Қазақстан Шанхай ынтымақтастық ұйымындағы өзінің төрағалығын сауда және қауіпсіздік саласындағы ынтымақтастықты кеңейту үшін топты «практикалық және тиімді платформаға» айналдыруға ниетті екендігі туралы мақала жариялады.
«Қазақстан Сыртқы істер министрлігінің өкілдері экологиялық проблемаларды шешу және «цифрлық салада» тығыз байланыстарды дамыту бойынша бірлескен іс-қимылдарды жандандыру қажеттігін атап өтті», - деп жазады басылым.
ШЫҰ Бас хатшысы Чжан Мин Қазақстанның 2023-2024 жылдарға арналған күн тәртібін мақұлдап, Қазақстан ШЫҰ-ны «ел халықтарының әл-ауқаты үшін практикалық өзара іс-қимылдың жаңа деңгейіне» шығара алады деп сенім білдірді.
Сыртқы істер министрлігінің хабарлауынша, төрағалық кезінде Қазақстан өзінің саяси басымдықтарын ілгерілету үшін 80-нен астам кездесулер мен іс-шаралар ұйымдастырады.
Қазақстан мен Ватикан арасындағы қосымша келісім күшіне енді - Vatican News
Vatican News жаңалықтар сайты 19 шілдеде пасторлық қызметкерлердің Қазақстанда тұруға рұқсат алуын жеңілдету үшін Ватикан мен Қазақстан арасындағы келісім күшіне енгенін жариялады.Бұл келісім екі ел арасындағы ынтымақтастықтың артып келе жатқанының белгісі ретінде қарастырылады.
«Қазақстанның Нұр-Сұлтан қаласында (бұрынғы атауы Астана) 2022 жылдың 14 қыркүйегінде қол қойылған бұл келісім діни қызметкерге Қазақстанда тұруға рұқсат алуды жеңілдетеді», - делінген мақалада.
Неліктен Қазақстан әлемдегі ең төмен бағаланған бағыттардың бірі - The Travel
The Travel сайты 16 шілдеде Қазақстан туралы мақала жариялады. Онда елді туристік бағыт ретінде «саяхатшылар үшін зерттелмеген жұмақ» деп сипаттайды.
«Қазақстан Орталық Азиядағы әлемдегі бағаланбаған елдердің бірі болуы мүмкін. Бұл дүниенің мүлде басқа аймағы, оған тәуелсіз ойлы санаулы адамдар ғана баруға ниетті болады», - деп жазады автор.
Мақалада Қазақстанға қалай және қашан бару керектігі, сондай-ақ не істеу керектігі туралы анықтамалық ақпарат бере отырып, Қазақстан тарихына кеңірек тоқталады.