BFMTV: Эмманюэль Макрон қарашаның басында Қазақстанға барады
Францияның BFMTV телеарнасы 2023 жылғы 1 қарашада Президент Қасым-Жомарт Тоқаевтың шақыруымен Франция президенті Эмманюэль Макрон Қазақстанға ресми сапармен баратынын хабарлады.
«Екі елдің көшбасшылары сауда-экономикалық, инвестициялық және энергетикалық ынтымақтастықты нығайту туралы келіссөздер жүргізеді және әртүрлі халықаралық және аймақтық мәселелерді талқылайды», - делінген BFMTV хабарламасында.
Мақалада атап өтілгендей, Қазақстан көшбасшысы Францияға дәл осындай сапармен тура бір жыл бұрын, 2022 жылдың қарашасында барған.
Arabnews: Қазақстан БАӘ-мен тауар айналымын 1 миллиард долларға дейін жеткізуге ұмтылуда
Arabnews агенттігінің хабарлауынша, Қазақстан Біріккен Араб Әмірліктерімен сауда айналымын былтырғы 632 миллион доллардан 1 миллиард долларға дейін ұлғайтуды жоспарлап отыр. Бұл туралы Emirates News Agency (WAM) агенттігіне берген сұхбатында Қазақстанның Сауда және интеграция министрі Арман Шаққалиев айтты. Сондай-ақ ол қос тарап екіжақты сауда қарым-қатынастарын арттыру үшін инвестициялық мақсаттарды талқылағанын айтты.
«Біз экологиялық, әлеуметтік және басқару салаларына инвестиция салуды, сондай-ақ климаттың өзгеруін талқыладық және Қазақстанның өкілі ретінде мен Каспий теңізінен БАӘ-нің Абу-Даби және Дубай порттарына дейінгі жаңа сауда жолдары бойынша жоспарларымызды көрсеттім», - деді ол Абу-Дабиде өткен БҰҰ Сауда және даму жөніндегі конференциясының сегізінші инвестициялық форумы аясында.
Арман Шаққалиев жаңа жолдың Орталық Азияны ауыл шаруашылығы хабы ретінде байланыстырып, аймақтық нарықтарды ашу жөнінде жаңа міндеттер қойып отырғанын айтты.
Nezavisimaya Gazeta: Қазақстан – жаңа Швейцария
Ресейлік Nezavisimaya Gazeta (ng.ru) газетінде саясаттанушы, Ресей-Қазақстан баспасөз орталығының сарапшысы Андрей Выползовтың Қасым-Жомарт Тоқаевтың сыртқы саясаты туралы мақаласы жарияланды.
«Қазақстан Президенті Қасым-Жомарт Тоқаевтың сыртқы саяси ұстанымы қоғамдық кеңістікте қызу пікірталас тудырып отыр. Батыс пен Ресей арасындағы текетірес шарықтау шегіне жеткен тұста Ресейдің ең жақын көршісі «шахмат ойнап», осы ақ-қара ойын тақтасындағы бәсекелестердің әрқайсысымен саяси қарым-қатынастарды дамытып, нығайтып жатқанын көпшілік қауым түсінбей әрі қабылдамай жатыр. Бүгінгі геосаяси ағымдағы Тоқаев феномені шынымен де ерекше», - деп жазады автор.
Мемлекет басшысы 2023 жылы мамыр мен қазан аралығында ғана Қытай мен Ресейге екі реттен, сонымен қатар Түркия, Сауд Арабиясы, Вьетнам, АҚШ, Германия секілді елдерге сапармен барғанын, 20 мемлекеттің басшыларымен кездескенін, сондай-ақ биыл елімізге келген қонақтардың деңгейін саралай келе, саясаттанушы Қазақстан «белсенді халықаралық ойында» екенін атап өтті.
«Қазақстан – әлемдік экономиканың маңызды бөлігі. Тәуекелдерді (әлемдік мұхитқа шыға алмайтыны мен геосаяси алпауыт елдердің ортасында қыстырылып қалғаны) орасан зор артықшылықтарға айналдыруға - Батыс пен Шығыс, Солтүстік пен Оңтүстік арасындағы жаһандық логистикалық хабқа айналуға ұмтылады», - деп жазады.
Андрей Выползовтың пікірінше, Қасым-Жомарт Тоқаев экономикадан бастап экологияға дейінгі ғаламшардың тыныс-тіршілігіне қатысты барлық салалардағы мәселелер бойынша шешім қабылдайтын орталық ретінде Қазақстанды алға шығара отырып, биік мінберлерден жаһандық бастамалар ұсынып отыр.
Euractiv: Қазақстанның ауған халқы алдындағы тұрақты міндеттемесі
Euractiv ақпарат агенттігі Қазақстан Республикасы Сыртқы істер министрінің орынбасары Әлібек Бақаевтың Ауғанстанның Герат провинциясындағы бірқатар жойқын жер сілкіністері туралы пікірін жариялады. Зілзала 2023 жылғы 7 және 11 қазанда болды, соның салдарынан 2500-ден астам адам қаза тапқан еді.
«Герат провинциясында жақында болған қуатты жер сілкіністері жойылу мен үмітсіздіктің ізін қалдырды. Соған қарамастан, Қазақстан тез әрекет етті. Біздің іздестіру тобымыз шұғыл әрекет етіп, қиын жағдайға тап болғандарға көмектесуге тырысты. Айта кету керек, құтқару жұмыстарына қатысқан азаматтардың ешқайсысы да өз миссиясы кезінде зардап шеккен жоқ»,-деп EurActiv Әлібек Бақаевтың сөзін келтірді.
Бақаев 11 қазанда Ауғанстанның Герат провинциясына салмағы 1600 тоннадан асатын жүк келгенін хабарлады. Гуманитарлық көмек ретінде азық-түлік, шатырлар, киім-кешек және төсек-орын жабдықтары сияқты маңызды заттар жіберілді, соның арқасында жойқын зілзаладан зардап шеккендердің өмірін сақтап қалуға мүмкіндік туды.
«Бүгінде ауған халқы жойқын жер сілкінісінің салдарымен күресіп жатқан кезде, біз Қазақстан мен Ауғанстан арасындағы саяси шекарадан асып түсетін берік байланысты атап өткіміз келеді», - деп атап өтті. Ол гуманитарлық көмек тек саясат мәселесі емес екенін, бұл қазақстандықтардың жомарттығы пен адамгершілігін бейнелейтін ұлтымыздың кең жүрегінің шынайы көрінісі екенін атап өтті.
Nova.news: «Әділетті ел құруға бел будық» - Қазақстан Республика күнін атап өтуде
Италияның Nova.news ақпарат агенттігі Қазақстанда Республика күні қалай мерекеленіп жатқаны жайлы мақала жариялады.
«Бүгін - талай ұрпақ ұмтылған, асқақ арманы болған азаттық мерекесі тойланып жатыр. Қасым-Жомарт Тоқаев қазақтың мемлекеттілік дәстүрі қайта жаңғырған тарихи күн екенін, Көк түріктер дәуірінен, Алтын Орда, Қазақ хандығы заманынан келе жатқан елдігіміз тамырын тапқан күн екенін еске салды»-,делінген Nova.news мақаласында.
Басылымның жазуынша, Қазақстан Президенті, ең алдымен, тәуелсіздіктің «шешуші кезеңде» «ұлттық мүддені қорғаған», «барлық проблемалар мен қиындықтарды еңсеру үшін күрескен» патриоттардың табандылығына құрмет көрсетті.
«Біз қазір Әділетті Қазақстанды құрып жатырмыз. Сондықтан өткен заманның қайраткерлеріне, олардың еңбегіне лайықты, әділетті баға беріп отыруымыз керек», - деп басылым Қасым-Жомарт Тоқаевтың сөзін келтіреді.
Caspian news: Астана Республика күнін атап өтіп жатыр
Caspian news ақпарат агенттігі де Қазақстан Республика күнін көптеген мерекелік шаралармен атап өткенін хабарлады.
«Астанада 200-ден астам мәдени, білім беру, спорттық және қоғамдық іс-шаралар өтті, бұл жетпіс жылға созылған кеңес дәуірінен кейінгі елдің тәуелсіздікке қарай жасаған алғашқы қадамын білдіреді», - делінген Caspian news мақаласында.
Мақалада мерекелік шаралар 23 қазанда басталып, үш күнге созылғаны атап өтілді. Бұл күндері концерттер, автошеру, көрме, балалардың көрнекті жерлерге экскурсиялары, дөңгелек үстелдер және ұлттық спорт турнирлері сияқты іс-шаралар өтті.
Сodastory: Сіздің есіміңізді бәрі білетін ақылды қала
Codastory америкалық онлайн жаңалықтар платформасы Қазақстанның бірнеше аймағында салынып жатқан smartcity жобасы («ақылды қала») туралы мақала жариялады.
«Бір қарағанда, бүгінде Ақкөл Қазақстанның басқа да шағын қалаларына ұқсайды: Бірақ қаланың шетінде, қарағайлармен қоршалған төбеде үлкен сұр және ақ түсті текше орналасқан: мұнда қаланың 13 000 тұрғынының күнделікті келіп-кетуін бақылайтын деректер терминалы бар, бұл жер - мыңдаған шақырым талшықты-оптикалық кабель, сенсорларды байланыстыратын орталық жүйке жүйесі іспетті. Бұл Қазақстандағы Smart Aqkol цифрлық қалалық инфрақұрылым саласындағы пилоттық зерттеудің басқару орталығы»-, делінген Codastory мақаласында.
Мақалада орталық қызметкерлері ғимаратқа жеке куәлік арқылы кіреді делінген. Командалық орталықта ауылдың сызбасы бейнеленген үлкен мониторы бар бөлме орналасқан. Smart Aqkol құрайтын деректерді енгізу және қосылған элементтер күн батареялары мен газ есептегіштерден бастап қоғамдық көліктердегі GPS трекерлері мен қауіпсіздік камераларына дейін барлығын пайдаланады. Командалық орталықтың сарапшылары энергияны пайдалану, мектепке бару деңгейі және полицияның тергеуі үшін дәлелдер туралы мәліметтерді ұсына отырып, әкімдікке өз нәтижелерін хабарлайды.