Шымкентте алғаш рет өте сирек кездесетін күрделі ота сәтті жасалды

ШЫМКЕНТ. KAZINFORM –  Шымкент қаласындағы №1 қалалық клиникалық ауруханада бүйрек аутотрансплантациясы сәтті жүзеге асырылды. Бұл туралы ДСМ баспасөз қызметі хабарлады. 

Бұл – науқастың өз бүйрегін алып, қайта қалпына келтіріп, өз ағзасына қайта отырғызу арқылы жасалатын аса күрделі операция.

1968 жылы туған науқас соңғы 5 жыл бойы артериялық гипертензиямен ауырған. Соңғы бірнеше жылда қан қысымы үнемі 250/140 және одан да жоғары болып, өміріне қауіп төндірген.

Мұндай жағдайда кез келген уақытта ми қан тамыры жарылып, инсульт алу қаупі өте жоғары болған.

2024 жылы науқастың құрсақ аортасына стент-графт имплантацияланған.

Ауруханаға ауыр халде түскен науқас толық тексеруден өткізілді. Тексеру нәтижесінде сол жақ бүйрекке баратын артерияның 99% тарылғаны анықталды.

Аортада стент-графт орнатылғандықтан, дәстүрлі шунттау операциясын жасау мүмкін болмады. Осыған байланысты науқастың сол бүйрегі алынып, оң жақ мықын артериясына қайта тігіліп орналастырылды.

Айта кетелік МӘМС есебінен жүргізілетін ең күрделі әрі қымбат ТОП-10 операция туралы жазған едік.