Шымкенттегі Мұхтар Әуезов атындағы университетке ұлттық мәртебе беріледі

ШЫМКЕНТ. KAZINFORM – Президент Қасым-Жомарт Тоқаев Мұхтар Әуезов атындағы Оңтүстік Қазақстан университетіне ұлттық мәртебе беру туралы шешім қабылдағанын мәлімдеді.

Фото: Шымкент қаласы әкімдігі ішкі саясат басқармасы

Мемлекет басшысы бұл туралы Астанада өткен Стратегиялық серіктестердің III халықаралық форумында айтты.

– Халқымыздың заңғар жазушысы Мұхтар Әуезов атындағы Оңтүстік Қазақстан университетіне «Ұлттық» мәртебе беру туралы шешім қабылдадым, – деді Қасым-Жомарт Тоқаев.

Университет өкілдерінің мәлімдеуінше, бұл шешім оқу орнының тарихындағы маңызды белес әрі ұжымға артылған үлкен сенім.

Сондай-ақ университеттің көпжылдық тарихына, ғылыми әлеуетіне, қалыптасқан білім беру дәстүріне және ел дамуына қосқан үлесіне берілген жоғары баға ретінде бағаланып отыр.

Айта кетейік, бұған дейін Президент Қасым-Жомарт Тоқаев Астана медицина университетіне ұлттық университет мәртебесін беру бастамасын қолдаған еді.