Шымкенттік емші асырап алған егіз елордаға қайтарылды

АСТАНА. KAZINFORM – Шымкенттік емші асырап алған 6 баласын қорлап, азаптады деген күдікпен қамауға алынды. Балаларды еліміздің әр қаласынан асырап алынғаны белгілі болды. Соның ішінде Астана қаласынан үш бірдей баланы рәсімдеп, бауырына басқан. Осы орайда қоғамды дүрліктірген оқиғаның мән-жайын Kazinform агенттігі назарына алған еді. 

«Балалар 2024 жылдың 3 шілдесінде Астана қаласына қайтарылып, елорда әкімдігінің «Арнаулы әлеуметтік қызметтерге мұқтаж балаларды қолдау орталығы мекемесіне орналастырылды», - деп жауап берді Астана қалалық Білім басқармасы басшысының орынбасары Серік Әділбаев Kazinform агенттігінің ресми сауалына. 

Айта кетейік, бұған дейін шымкенттік емші асырап алған егіздің елордаға қайтарылатыны туралы хабарлаған едік. 

Еске салсақ, Шымкенттік емші асырап алған 6 баласын қорлап, азаптады деген күдікпен қамауға алынғаны айтылды. 

Ол асырап алған балаларына ит пен мысықтың етін жегізді деген дерек шықты. 

Осы оқиғаға байланысты білім саласының бірқатар қызметкері жазаланды. Сонымен қатар қалалық денсаулық сақтау басқармасындағылар балалардың қазіргі жағдайы туралы айтып берді. 

Сондай-ақ балалардың елдің бірнеше қаласынан асырап алынғаны белгілі болды. 

Балалардың бірінің әжесі Өскеменде тұрады. Kazinform тілшісі 65 жастағы Наталья Устиновамен жолығып, жиен немересінің асырауға қалай берілгенін сұрап көрді. 

Ал, Шымкенттегі балалар үйінің басшысы емшіден қорлық көрген оқушы туралы айтып берді. 

Одан бөлек, шымкенттік емшінің осыдан 31 жыл бұрын адам өлтіргені расталды.