ШЫҰ 2024 жылды Экология жылы деп жариялады
Биылғы 10-13 қазан аралығында Бейжің қаласында Қазақстанның төрағалығымен Қоршаған орта мәселелеріне жауап беретін Шанхай Ынтымақтастық Ұйымына (ШЫҰ) мүше елдердің министрліктері мен ведомстволары сарапшыларының отырысы өтті.
Бұл туралы Kazinform ҚР Экология, геология және табиғи ресурстар министрлігінің баспасөз қызметіне сілтеме жасап хабарлайды.
Айта кету керек, Қазақстан Республикасы биылғы шілде айынан бастап ШЫҰ-ға төрағалық етті. Қоршаған ортаны қорғау саласындағы ынтымақтастықтың маңыздылығын атап өтіп, 2024 жыл ШЫҰ Экология жылы болып жарияланды.
Осыған байланысты қазақстандық тарап бірқатар маңызды құжаттарды әзірледі: 2024 жылы ШЫҰ Экология жылын өткізу жөніндегі іс-шаралар жоспары, экологиялық проблемалардың тізілімі, ерекше қорғалатын табиғи аумақтарды және экологиялық туризмді дамыту саласындағы ынтымақтастық бағдарламасы, ШЫҰ-ға мүше мемлекеттердің үкіметтері арасындағы Қоршаған ортаны қорғау саласындағы ынтымақтастық туралы келісім, Мемлекеттер басшылары кеңесінің мәлімдемесі-Шанхай ынтымақтастық ұйымының мүшелері қалдықтарды тиімді басқару туралы.
Осы құжаттардың жобалары Бейжің қаласында өткен сараптамалық отырыс аясында талқыланды.
Сонымен қатар, қазақстандық тараптың бастамаларының бірі дүниежүзілік қоғамдастықтың назарын ШЫҰ экологиялық проблемаларына аудару және ШЫҰ Хатшылығы мен ЮНЕП арасындағы өзара түсіністік туралы Меморандумға қол қою мақсатында БҰҰ алаңында министрлердің, ШЫҰ-ға мүше мемлекеттердің бейресми кездесуін ұйымдастырутуралы ұсыныс болды.
Қоршаған ортаны қорғау мәселелеріне жауапты ШЫҰ-ға мүше мемлекеттердің сарапшылары отырысының қорытындысы бойынша кездесу хаттамасына қол қойылды.