ШҚО-да «Бірқабатты Шығыс» бағдарламасы қалай жүзеге асуда
«Бұл бағдарлама өңірімізде сәтті жүзеге асырылып, халықтың жоғары қызығушылығына ие болды. Мысалы, Өскемен қаласының өзінде ғана 6 мыңнан астам адам өз беттерімен үй салуға ниет білдіруде. Біз өз тарапымыздан тұрғындар уақыт пен ақша үнемдей алу үшін инженерлік инфрақұрылымы жүргізілген учаскелерді ұсынамыз. Осы ретте құрылыс басқармасы жылу желілерінің жағдайын талдап, қуаттылықты қай жерде арттыру керектігін анықтауы керек», - деді аймақ басшысы.
Сондай-ақ ол Өскемен мен Семей қалалары әкімдеріне бір апта ішінде үй құрылысына тиімді учаскелерге қатысты жобаларды әзірлеуді тапсырды.
«Өйткені құрылыс маусымы басталған кезде, яғни сәуір-мамыр айларында барлығы дайын болуы тиіс. «Бірқабатты Шығыс» бағдарламасын іске асыру бойынша Семей, Зайсан және Аягөз қалалары алдыңғы қатарда. Осы бағдарламаға барлық қалалар мен аудандар қатысуы керек. Сол кезде ғана тұрғын үй мәселесі шешіледі. Сондықтан барлық елді мекендер бойынша ақпарат жинақталып, тұрғындар қолайлығы үшін учаскелерде коммуникация желілері толықтай тартылуы шарт», - деді Даниал Ахметов.