ШҚО ақпарат орталығында баспасөз мәслихатын өткізген Экология және табиғи ресурстар министрі Зүлфия Сүлейменова өңірдегі табиғат қорғау мақсатында атқарылып жатқан шаралар туралы айтып берді.
Оның сөзінше, Қазақстанда 5 жыл ішінде 16 апатты су қоймасында реконструкция жұмыстары жүргізіледі. Оның ішінде Шығыс Қазақстан облысында 2 су қоймасы (Зайсан және Тарбағатай аудандарында) қалыпқа келтірілмек.
«Орман шаруашылығы саласына қатысты айтар болсақ, өңір бойынша 2 млрд ағаш отырғызылады. Соңғы екі жылда 1300 гектар аумаққа 6,1 млн ағаш егілген. Ал осы жылдың соңына дейін облыста 1500 гектар жерге 8 млн ағаш отырғызылады деп жоспарланып отыр», - дейді Зүлфия Сүлейменова.
Сонымен қатар Шығыс Қазақстан облысында балық шаруашылығын дамыту бойынша бірқатар жұмыс жүргізіліп жатыр. 7 жыл ішінде аймақта балық өсіру көлемін 9,7 мың тоннаға жеткізу көзделген. 2023 жылдың үш айында облыста 769 тонна тауарлық балық өсірілді.