ШҚО-да Бұқтырма су қоймасынан екі бала құтқарылды

ӨСКЕМЕН. KAZINFORM – Шығыс Қазақстан облысында Бұқтырма су қоймасында екі бала құтқарылды, деп хабарлайды Төтенше жағдайлар министрлігі.

Оқиға Алтай ауданында тіркелді. SUP-бордпен сырғанау кезінде қатты жел мен ағыс салдарынан балаларды жағадан алыстатып әкеткен.

Балалардың ата-аналары бірден құтқарушыларға хабарласқан. Шақырту бойынша жедел-құтқару жасағының қызметкерлері оқиға орнына дереу жетті.

Құтқарушылар моторлы қайықтың көмегімен балаларды аман-есен жағаға шығарды. Оларға медициналық көмек қажет болған жоқ. Тексерістен кейін балалар ата-аналарына тапсырылды.

Төтенше жағдайлар министрлігі азаматтарға мынадай ескертулерді сақтау қажеттігін еске салады:

• Балаларды су жағасында қараусыз қалдырмаңыз;

• Қайықпен, катамаранмен және SUP-бордпен сырғанағанда құтқару кеудешелерін қолданыңыз;

• Ауа райы жағдайын және желдің күшін қадағалаңыз.

Айта кетейік, ТЖМ құтқарушылары үш мыңдық биіктіктен үш адамды эвакуациялады.