ШҚО-да есірткі өндірумен айналысқан екі Латвия азаматына сот үкімі кесілді

ӨСКЕМЕН. KAZINFORM – ШҚО қылмыстық істер жөніндегі мамандандырылған ауданаралық сотының үкімімен екі Латвия азаматы 11 жылға бас бостандығынан айырылды. Бұл туралы ШҚО прокуратурасы мәлім етті.

Бұған дейін, 2024 жылғы шілдеде, облыс прокуратурасы ҰҚК ШҚО бойынша департаментімен қадағалау органының үйлестіруімен синтетикалық есірткі өндіруге арналған жасырын зертхананың анықталғаны туралы хабарлаған болатын.

Еске сала кетсек, тінту барысында 125 кг мефедрон (630 мың бір реттік дозаға баламалы), 500 литр прекурсорлар және тәулігіне 30 кг синтетикалық есірткі өндіруге мүмкіндік беретін жаңа буынды зертханалық жабдық тәркіленген.

Тәркіленген есірткінің қара нарықтағы құны 3,5 миллиард теңгеден асады.

Қылмыстық іс сотта 3 ай бойы қаралды. Сот процесі барысында айыпталушылардың кінәсі толық дәлелденіп, мемлекеттік айыптаушы соттан 11 жыл бас бостандығынан айыру жазасын тағайындауға бағдар берді.

Сотталғандар жазасын орташа қауіпсіздік деңгейіндегі түзеу мекемесінде өтейді. Сот үкімі заңды күшіне енген жоқ.

Еске сала кеетейік, бұған дейін Шығыс Қазақстанда қос азаматтықпен жүрген 16 адам анықталғанын жазған болатынбыз.