ӨСКЕМЕН. ҚазАқпарат – Шығыс Қазақстан облысында қар құрсауында қалған 16 жүк көлігінің жүргізушілері эвакуацияланды, деп хабарлайды ҚазАқпарат тілшісі.
ШҚО Төтенше жағдайлар департаменті баспасөз қызметінің мәліметіне сүйенсек, Зайсан ауданында құтқарушылар жолда қалған жүргізушілерге көмекке келді.
«Омбы-Майқапшағай» тасжолының Қаратал ауылындағы учаскесінде 16 жүк көлігі қар құрсауында қалған. Жүргізушілер қатты аяз бен ауа-райының қолайсыздығына қарамастан жолға шыққан. Сол жерге №25 өрт сөндіру бөлімшесінің құтқарушылары келіп жетті. Олар ер адамдарды жол талғамайтын «КУНГ» көлігімен ауылға жеткізді», - делінген ақпаратта.
Жүргізушілердің біріне дәрігер көмегі қажет болды. Оның қолы үсіп қалған. Азамат жақын жердегі медициналық мекемеге жеткізілді.
Айта кетейік, «Қазгидромет» Шығыс Қазақстан облысында 42 градусқа дейін аяз болатынын хабарлады.
Талғатжан Мұхаметбекұлы
Өскемендегі С.Аманжолов атындағы ШҚУ-ды "Журналистика" мамандығы бойынша тәмамдаған. Еңбек жолын 2015 жылы ШҚО "Алдаспан" газетінде тілші болып бастады. ШҚО "Менің өлкем" газетінде тілші, республикалық "Жас қазақ", "Заң" газеттерінде Шығыс Қазақстан облысы бойынша меншікті тілші, ШҚО "Менің өлкем" газетінің бас редакторы қызметтерін атқарған. Kazinform агенттігінде 2021 жылдан бері жұмыс істеп келеді.