ШҚО-да қар құрсауында қалған 16 жүк көлігінің жүргізушілері эвакуацияланды
05:16, 28 Қараша 2022
ӨСКЕМЕН. ҚазАқпарат – Шығыс Қазақстан облысында қар құрсауында қалған 16 жүк көлігінің жүргізушілері эвакуацияланды, деп хабарлайды ҚазАқпарат тілшісі.
ШҚО Төтенше жағдайлар департаменті баспасөз қызметінің мәліметіне сүйенсек, Зайсан ауданында құтқарушылар жолда қалған жүргізушілерге көмекке келді.
«Омбы-Майқапшағай» тасжолының Қаратал ауылындағы учаскесінде 16 жүк көлігі қар құрсауында қалған. Жүргізушілер қатты аяз бен ауа-райының қолайсыздығына қарамастан жолға шыққан. Сол жерге №25 өрт сөндіру бөлімшесінің құтқарушылары келіп жетті. Олар ер адамдарды жол талғамайтын «КУНГ» көлігімен ауылға жеткізді», - делінген ақпаратта.
Айта кетейік, «Қазгидромет» Шығыс Қазақстан облысында 42 градусқа дейін аяз болатынын хабарлады.