СЕМЕЙ. ҚазАқпарат – Сыбайлас жемқорлыққа қарсы іс-қимыл агенттігінің Шығыс Қазақстан облысы бойынша департаменті пара алған Семей гарнизоны эксплуатация бөлімінің бастығы мен оның орынбасарына қатысты қылмыстық істі аяқтады, деп хабарлайды ҚазАқпарат тілшісі.
«Алдын ала сөз байласқан олар кәсіпкер мен ҚР Қорғаныс министрлігі «Әскерилерді баспанамен қамтамасыз ету бас басқармасы» Республикалық мемлекеттік кәсіпорнының келісімшарты аясында 57,4 млн теңге сомасына болат сым жеткізудің орындалған жұмыстар актілеріне қол қою үшін 1,8 млн теңге көлемінде пара алды деген күдікке іліккен болатын», - делінген департаменттің баспасөз қызметі таратқан ақпаратта.
Семей гарнизоны Әскери сотының үкімімен бөлім бастығы 9 жылға, ал оның орынбасары 7 жылға түрмеге қамалды. Сондай-ақ айыпталушылар мемлекеттік қызметте лауазым атқару құқығынан өмір бойына айырылды.
Талғатжан Мұхаметбекұлы
Өскемендегі С.Аманжолов атындағы ШҚУ-ды "Журналистика" мамандығы бойынша тәмамдаған. Еңбек жолын 2015 жылы ШҚО "Алдаспан" газетінде тілші болып бастады. ШҚО "Менің өлкем" газетінде тілші, республикалық "Жас қазақ", "Заң" газеттерінде Шығыс Қазақстан облысы бойынша меншікті тілші, ШҚО "Менің өлкем" газетінің бас редакторы қызметтерін атқарған. Kazinform агенттігінде 2021 жылдан бері жұмыс істеп келеді.