ШҚО-да сайлау комиссиясының мүшелері 3 күндік үй карантиніне жіберілді

ӨСКЕМЕН. ҚазАқпарат – Шығыс Қазақстан облысында сайлау комиссиясының мүшелері 3 күндік үй карантиніне жіберілді, деп хабарлайды ҚазАқпарат тілшісі.

ШҚО Бас мемлекеттік санитарлық дәрігері міндетін атқарушының жаңа қаулысы жарияланды. Онда сайлау комиссиясы мүшелерінің 72 сағаттық үй карантиніне оқшауланғаны жазылған.

«Сайлау комиссиясының мүшелері 3 күн өткеннен кейін ПТР әдісімен COVID-19-ға сынама тапсыруы тиіс. Оң нәтиже болған жағдайда жұмыстан шеттетіледі. Бұл ретте, облыстық Денсаулық сақтау басқармасы 72 сағат ішінде үй карантиніндегі сайлау комиссияларының мүшелерін медициналық бақылауды қамтамасыз етуі қажет», - делінген қаулыда.

Сонымен қатар қала және аудан әкімдіктері Қазақстан Республикасы Парламенті Мәжілісінің және мәслихаттар депутаттарының сайлауы өткізілген объектілерде дезинфекциялау жұмыстарын жүргізуге міндетті.