ӨСКЕМЕН. ҚазАқпарат – Шығыс Қазақстан облысында велосипедтің бір бөлшегі аяғына кірген 10 жасар балаға құтқарушылар көмекке келді, деп хабарлайды ҚазАқпарат тілшісі.
ШҚО Төтенше жағдайлар департаменті баспасөз қызметінің мәліметіне сүйенсек, велосипед теуіп жүрген баланың аяғын арматура қысып қалған.
«Бала құлаған кезде тежегіш тұтқасы санына кіріп кеткен. Оқиға орнына келіп жеткен жедел-құтқару жасағының қызметкерлері гидравлика құралының көмегімен рульді қиып алды. Содан соң зардап шеккен 10 жастағы бала жедел жәрдем дәрігерлеріне тапсырды», - деп хабарлады ведомство өкілдері.
Осы ретте, ТЖД мамандары ата-аналарға балаларын қараусыз қалдырмау қажеттігі туралы ескертеді. Қандай да бір қиындық туындаған жағдайда «112» нөміріне қоңырау шалу керек.
Талғатжан Мұхаметбекұлы
Өскемендегі С.Аманжолов атындағы ШҚУ-ды "Журналистика" мамандығы бойынша тәмамдаған. Еңбек жолын 2015 жылы ШҚО "Алдаспан" газетінде тілші болып бастады. ШҚО "Менің өлкем" газетінде тілші, республикалық "Жас қазақ", "Заң" газеттерінде Шығыс Қазақстан облысы бойынша меншікті тілші, ШҚО "Менің өлкем" газетінің бас редакторы қызметтерін атқарған. Kazinform агенттігінде 2021 жылдан бері жұмыс істеп келеді.