ШҚО-да зейнеткердің 3 млн теңгелік зергерлік бұйымдары қолды болды

ӨСКЕМЕН. ҚазАқпарат – Шығыс Қазақстан облысында қарақшы зейнеткердің үйінен 3 млн теңгенің зергерлік бұйымдарын қолды етті, деп хабарлайды ҚазАқпарат.

Ұры үйде ешкімнің жоқтығын пайдаланып, жуынатын бөлменің пластик терезесін қысып ашу арқылы ішке енген. Солайша, зейнеткердің алтын бұйымдарын қолды етіп, 3 миллион теңгеге шығын келтірген.

Тәртіп сақшылары жедел-іздестіру шаралары барысында күдіктіні көп ұзамай анықтады.

«20 жастағы павлодарлық азамат Семейдегі автобекеттен ұсталды. Анықталғандай, ол Алматы қаласына қашып кетпек болған», – деп хабарлады Өскемен қалалық Полиция басқармасының баспасөз қызметінен.

Қазіргі уақытта ҚР Қылмыстық кодексінің 188-бабы 3-бөлігі (ұрлық) бойынша тергеу амалдары жүргізілуде.

Авторы: Талғатжан Мұхаметбекұлы