ШҚО-да жолда қалған автобустан 11 жолаушы құтқарылды

ӨСКЕМЕН. ҚазАқпарат – Шығыс Қазақстан облысында жолда қалған автобустан 11 адам эвакуацияланды, деп хабарлайды ҚазАқпарат тілшісі.

ШҚО төтенше жағдайлар департаменті баспасөз қызметінің мәліметіне сүйенсек, «Алматы-Өскемен» тасжолының 932 шақырымындағы Жарма ауданы Балықтыкөл ауылында автобус сынып қалған.

Семей мен Алматы қалаларының арасында қатынайтын автобустың ішінде 15 жолаушы болған.

Оның ішінде 5 бала бар. Оқиға орнына құтқарушылар шұғыл келіп жетті.

«№32 өрт сөндіру бөлімінің қызметкерлері қоғамдық көліктен 11 адамды, оның ішінде 5 баланы эвакуациялады. Олар Жаңаөзен ауылындағы спорттық лагерьге орналастырылды. Ал 2 жүргізуші мен 2 жолаушы эвакуацияланудан бас тартқан», - делінген ақпаратта.

Осы ретте құтқарушылар өңір жұртшылығына алыс сапарға шығар алдында жолдардың жай-күйін «Дәрмен» мобильді қосымшасы арқылы тексеріп отыруға кеңес берді.