ӨСКЕМЕН. ҚазАқпарат – Шығыс Қазақстан облысындағы әрбір үшінші жер үйде өрт қауіпсіздігі талаптары бұзылған, деп хабарлайды ҚазАқпарат тілшісі.
ШҚО төтенше жағдайлар департаменті баспасөз қызметінің мәліметіне сүйенсек, жылыту кезеңі басталғалы құтқарушылар жер үйлерге бақылауды күшейтті.
Барлығы 67 000-нан астам үй тексеріліп, нәтижесінде өрт қауіпсіздігін бұзудың 15 581 фактісі анықталды. Бұл негізінен пештерді, электр жабдықтары мен аспаптарды пайдалану кезінде қауіпсіздік ережелерін сақтамауға қатысты болып отыр.
«Әр үйде облыстық ТЖД инспекторлары мен өрт сөндірушілер түсіндіру жұмыстарын жүргізді. Біздің басты міндетіміз – өрт шығуының және тұрғындарға иіс тиюінің алдын алу», - дейді департамент бастығының орынбасары Серік Амангелдин.
Рейдтер әрбір үшінші үйде өрт қауіпсіздігі талаптары бұзылғандығын көрсетті. ТЖД қызметкерлерінің тұрақты ескертулеріне қарамастан, олқылықтың орнын толтырып жатқандар аз.
Айта кету керек, жыл басынан бері облыстағы жер үйлерде 211 рет өрт болды.
Талғатжан Мұхаметбекұлы
Өскемендегі С.Аманжолов атындағы ШҚУ-ды "Журналистика" мамандығы бойынша тәмамдаған. Еңбек жолын 2015 жылы ШҚО "Алдаспан" газетінде тілші болып бастады. ШҚО "Менің өлкем" газетінде тілші, республикалық "Жас қазақ", "Заң" газеттерінде Шығыс Қазақстан облысы бойынша меншікті тілші, ШҚО "Менің өлкем" газетінің бас редакторы қызметтерін атқарған. Kazinform агенттігінде 2021 жылдан бері жұмыс істеп келеді.