Өңірде биыл еңбек заңнамасын бұзудың 456 дерегі анықталды. Мемлекеттік еңбек инспекциясы комитеті ШҚО бойынша департаменінің инспекторлары жалпы саны 350 тексеру жүргізіп, заң талаптарының орындалуын бақылады.
- Жыл басынан бері бізге жеке және заңды тұлғалардан 2 мыңнан астам өтініш түсті. Олардың басым бөлігі еңбек қатынастарына қатысты. Тексеру нәтижесінде 212 нұсқама беріліп, әкімшілік құқық бұзушылықтар бойынша жалпы сомасы 19,6 млн теңгеге айыппұл салынды, - дейді департамент басшысы Бақытбек Қизатов.
Облыс кәсіпорындарында 74 жазатайым оқиға тіркеліп, 94 адам зардап шеккен. Оның ішінде 9 адам қаза болып, 46 адам ауыр жарақат алды.
Жазатайым оқиғалардың негізгі себептері - жұмыстарды ұйымдастырудағы кемшіліктер мен еңбек қауіпсіздігі талаптарының бұзылуы.
- Оқыс оқиғалардың алдын алу мақсатында арнайы тергеп-тексеру жұмыстары жүргізіліп, жауапты тұлғаларға қатысты тиісті шаралар қабылданды. Сондай-ақ биыл жұмыскерлерге 293,6 млн теңге көлеміндегі жалақы берешегі төленіп, 964 адамның еңбек құқықтары қорғалды, - дейді Бақытбек Қизатов.
Алайда әлі күнге дейін екі кәсіпорынның 19 жұмыскерге 16,5 млн теңге жалақы берешегі қалып отыр.
Еске салсақ, биыл Павлодарда өндірістік жарақаттан 11 адам көз жұмғаны хабарланған.