ӨСКЕМЕН. ҚазАқпарат – Өскемен қаласының тұрғыны «1406» call-орталығына хабарласып, коронавирус жұқтырғанын айтқан. Тексере келе оның сөзі жалған болып шықты, деп хабарлайды ҚазАқпарат.
Қалалық Полиция басқармасы баспасөз қызметінің мәліметіне сүйенсек, ер адам 25 наурызда тәулік бойы жұмыс істейтін call-орталыққа қоңырау шалған. Ол операторға жуықта Таиландттан келгенін, өзінде ЖРВИ белгілері бар екендігін айтқан.
«Дереу жеткен мамандар 39 жастағы тұрғыннан вирустық инфекцияның белгілерін байқамады. Дені құлан-таза сау азаматтың ішімдік ішіп алғаны белгілі болған. Сондай-ақ тексеру кезінде өскемендіктің шетелге шықпағаны анықталды», - деп хабарлады ведомство өкілдері.
Жалған мәлімет бергені үшін ер адамға ҚР ӘҚБтК-нің 438-бабы 1-бөлігі бойынша 30 АЕК мөлшерінде айыппұл салынуы мүмкін.
Талғатжан Мұхаметбекұлы
Өскемендегі С.Аманжолов атындағы ШҚУ-ды "Журналистика" мамандығы бойынша тәмамдаған. Еңбек жолын 2015 жылы ШҚО "Алдаспан" газетінде тілші болып бастады. ШҚО "Менің өлкем" газетінде тілші, республикалық "Жас қазақ", "Заң" газеттерінде Шығыс Қазақстан облысы бойынша меншікті тілші, ШҚО "Менің өлкем" газетінің бас редакторы қызметтерін атқарған. Kazinform агенттігінде 2021 жылдан бері жұмыс істеп келеді.