ШҚО: Серебрянскіде педофил қылмыс орнында ұсталды

None
ӨСКЕМЕН. ҚазАқпарат - ШҚО-ның Зырян ауданы Серебрянск қаласында жергілікті тұрғындар 8 жасар қызды зорлаған 31 жастағы ер адамды ұстап, оны полицияға табыстады.

Қаланың кездейсоқ тұрғындары қыз баланың шыңғырған дауысын естіп, көмекке жүгірген. Қатты шошынып қалған қызды дереу ауруханаға алып кетті, деп хабарлады «ҚазАқпарат» ХАА тілшісі.

Педофил тұтқындалды, оған қатысты тергеу шаралары жүріп жатыр, сараптама тағайындалды, деп хабарлады облыстық ішкі істер департаментінен.

 Бұған дейін бірнеше рет істі болған ер адам қыздың анасының танысы екені анықталды.  Әйелдің отбасы жағдайы төмен. Кезекті отырыс кезінде ішімдікке тойып алған қыздың анасы ұйықтап қалған. Ал оның бөтелкелесі қызға шоколад беремін деп алдап, адам жоқ жерге алып барған. Кейін баланы зорлаған.

Қылмыс 6 қарашада орын алған. Соңғы уақыттарда ішкі істер департаменті мұндай криминалдық қылмыс жайлы ақпарат беруді тоқтатқан. Бұл факті жөнінде тілшілердің бірі Зырян қаласында сегіз жасар қызды зорлау және өлтіру қылмысының мән-жайын білу кезінде кездейсоқ анықтаған.