ШҚО тұрғыны полиция оғынан жарақаттанды: оқиға тексеріліп жатыр
Айта кетейік, оқиға 26 шілдеде «Қарағанды-Боғас» тас жолында тіркелген. Полиция қызметкерлерінің «тоқта» деген пәрменін орындамаған 64 жастағы құқықбұзушы көлігімен қашып, із суытып кетпек болған. Дәл осы көліктің артқы салонында 63 жастағы жолаушы отырған. Полиция қызметкерлерінің бірі жүргізушіні тоқтату үшін табельдік қаруды қолданып, алда келе жатқан көліктің дөңгелегіне екі оқ атқан. Атылған екі оқтың бірі салонға өтіп кетіп, жолаушыға тиген. Бұл оқиға туралы бірқатар БАҚ жазған болатын. Болған оқиғаны ШҚО ІІД баспасөз қызметі растап отыр.
Осы іске қатысты бүгін ШҚО прокуратурасы ресми ақпарат таратты. Құзырлы органның хабарлауынша, полиция қызметкерлері көлікті қуып жетпекші болған кезде табельдік қаруды қолданған: яғни, бір оқты аспанға, екі оқты «Мазда» көлігінің дөңгелектеріне атқан. Ұсталған кезінде мас күйіндегі көлік жүргізушісі З. полиция қызметкерлеріне қарсылық көрсеткен.
«Сонымен бірге, 27 шілдеде 63 жастағы Б. деген азамат ауыр дене жарақаттарымен Аягөз аудандық ауруханасына жеткізілген. Алдын ала мәліметтер бойынша, мас күйдегі Б. тоқтатылған «Мазданың» артқы орындығында отырған. Көлік жүргізушісімен тартыс кезінде полиция қызметкерлері Б. деген азаматты байқамаған болуы керек. Б. өздігінен көліктен шығып кеткен, ал кейін ауруханаға барған. Сол күні Аягөз аудандық аурухана дәрігерлері Аягөз АІІБ-не Б. деген азаматтың дене жарақаттарынан басқа оқпен жараланғанын хабарлаған. Ол жарақатты Б. қандай жағдайда алғанын тергеу анықтайтын болады», - делінген прокурордың баспасөз баянында.
Сондай-ақ ШҚО прокурорының баспасөз қызметі аталған жағдай бойынша ҚР ҚК-нің 362-бабы, 4-бөлігі (билiктi немесе лауазымдық өкiлеттiктердi асыра пайдалану кезінде ауыр зардаптарға әкеліп соғу) бойынша сотқа дейінгі тергеу басталғанын хабарлады.