ӨСКЕМЕН. ҚазАқпарат – 7 қыркүйек күні Өскемен-1 станциясындағы желілік полиция бөлімі басшысының жетекшілік етуімен «Транзит» жедел алдын алу шарасы аясында Шығыс Қазақстан облысы, Серебрянск теміржолына жақын орналасқан жер үйлердің біріне тінту жүргізілді, деп хабарлайды ҚазАқпарат тілшісі.
Тінту барысында 45 жастағы азаматтың бақшасында, ауласында, шатырдың астында және үйінің ішінде полиэтилен пакеттерге салынған, өткір иісі бар жасыл түсті өсімдік тектес заттар табылды. Сот-химиялық сараптаманың қорытындысына сәйкес, бұл заттар қарасора мен кептірілген марихуана болып шықты.
Тәркіленген есірткінің жалпы салмағы 50 келіден асады. Аталған факті бойынша есірткі заттарын аса ірі көлемде заңсыз сақтағаны үшін сотқа дейінгі тергеу басталды.
Айта кетейік, Өскемен-1 станциясындағы желілік полиция бөлімі жыл басынан бері есірткіге қатысты 13 қылмыс фактісін анықтады. Оның екеуі ауыр санатқа жатқызылған.
Талғатжан Мұхаметбекұлы
Өскемендегі С.Аманжолов атындағы ШҚУ-ды "Журналистика" мамандығы бойынша тәмамдаған. Еңбек жолын 2015 жылы ШҚО "Алдаспан" газетінде тілші болып бастады. ШҚО "Менің өлкем" газетінде тілші, республикалық "Жас қазақ", "Заң" газеттерінде Шығыс Қазақстан облысы бойынша меншікті тілші, ШҚО "Менің өлкем" газетінің бас редакторы қызметтерін атқарған. Kazinform агенттігінде 2021 жылдан бері жұмыс істеп келеді.