Шомылатын су сапасы ең жоғары еуропалық ел анықталды

АСТАНА. KAZINFORM — Кипр Еуропада су сапасы жағынан көшбасшы ел атанды. Кипр суының 97,6 %-ы «өте жақсы» деп бағаланған, деп жазады АЗЕРТАДЖ.

Бұл туралы Еуропалық қоршаған орта агенттігінің соңғы есебінде айтылған.

Рейтингте екінші орында — Австрия (96,9 %), үшінші орында — Хорватия (96,7 %), төртінші орында — Греция (95,8 %). Ал рейтингтің соңғы жақтарында — Польша (54,9 %) және ең төменгі орында — Албания (41,2 %) тұрақтады.

Бағалау 2020–2023 жылдары Еуропалық Одақ елдері ұсынған су үлгілеріне негізделіп жүргізілді. Бағалау барысында шомылатын судағы екі патогенді микроағза — энтерококк және Helicobacter pylori бар-жоғы тексерілді. Бұл — 2006 жылғы шомылатын суға қатысты Еуропалық директива талаптарына сәйкес.

Тағы бір қуантарлық жаңалық — Еуропалық Одағы елдеріндегі сулардың басым көпшілігі қауіпсіз болып танылды: шамамен 22 000 сынақ алынған жердің 85%-ы «өте жақсы» деп бағаланған. Сонымен бірге теңіз суы өзен мен көл суларымен салыстырғанда сапалырақ екендігі расталды.

Соңғы жылдары Еуропада шомылуға арналған сулардың сапасы айтарлықтай жақсарды. Бұл, негізінен, мониторинг пен басқару жүйелері тиімдірек жұмыс істеп, сондай-ақ биологиялық тазарту технологияларына үлкен инвестициялар салынуына байланысты. Дегенмен, климаттың өзгеруі мен экстремалды ауа райы (мысалы, су тасқыны) осы жетістіктерге қауіп төндіруі мүмкін.

Бұдан бұрын хабарланғандай, наурыз айында Кипрдегі температура 30°C-қа дейін көтерілді, сондықтан көптеген кипрлік жағажайларға шықты.