АЛМАТЫ. ҚазАқпарат - Шорт-тректен Алматыда өтіп жатқан әлем кубогы кезеңінде қазақстандықАбзал Әжіғалиев 500 метр қашықтықта қола жүлдегер атанды, деп хабарлайды ҚазАқпарат тілшісі.
А финалында жарыс жолына бес спортшы шықты.
Бәсеке барысында екінші орында келе жатқан Абзал ең соңғы сәтте ғана күміс медальды уысынан шығарып алды.
Осылайша 500 метрлік қашықтықта Олимпиада чемпионы,канадалық Самуэль Жирар жеңімпаз атанды. Абзалдан конькиі ғана озған тағы бір атақты спортшы, венгриялық Шаоанг Лю екінші орынға көтерілді.
В финалында екі-ақ спортшы жүгірді. Қорытындысында Денис Никиша жетінші орынға тұрақтады.
Батыс Қазақстанда туып-өсіп, қазір Астана атынан шығып жүрген Абзал Әжіғалиев бұдан бұрын Калгари қаласында өткен әлем кубогының алғашқы кезеңінде дәл осы қашықтықта күміс жүлдеге қол жеткізген еді.
Еске сала кетейік, бұдан бұрын қос қазақстандық спортшының 500 метр қашықтықта финалға өткенін жазған болатынбыз.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).