Шорт-трекші Әділ Ғалиахметов Олимпиада финалында 8-інші келді

НҰР-СҰЛТАН. ҚазАқпарат – Бейжіңдегі Олимпиада ойындарында шорт-тректен 1500 метрге жүгіруде финалдық жарыстар өтті. Қазақстандық спортшы Әділ Ғалиахметов 8-орын алды, деп хабарлайды ҚазАқпарат Ұлттық Олимпиада комитетіне сілтеме жасап.

23 жастағы Ә.Ғалиахметов әлемнің кіл мықтыларымен бір қатарда өнер көрсетіп, 8-орынға табан тіреді.

Аталған қашықтықта Олимпиада чемпионы атағын Оңтүстік Корея өкілі Хван дэ Хон жеңіп алды.

Күміс медальді канадалық Стивен Дюбуа, қола медальді ресейлік Семен Елистратов иеленді.

Айта кетейік, бұл нәтиже қазақстандық Әділ Ғалиахметов үшін үлкен жетістік. Әділ ересектер арасындағы Олимпиада ойындарына алғаш рет қатысып, бірінші мүмкіндігінде-ақ финалға жолдама алды.

ФОТО: Владислав Семенов, Қазақстан ҰОК