Швейцария Гүлнәр Каримованың 370 млн доллар активін тәркіледі

Швейцария прокуратурасы Өзбекстанның бұрынғы президентінің қызы Гүлнәр Каримоваға «Офис» деген атпен танылған халықаралық қылмыстық ұйымның басшысы болды деген айып тақты. ҚазАқпарат бұл туралы ВВС-ге сілтеме жасап хабарлайды.

Прокурорлардың сөзінше, 51 жастағы Каримова жемқорлық, алаяқтық пен ұйымдасқан қылмысқа қатысты ауқымды істің басында болған.

Ол Өзбекстаннан жүздеген миллион долларды ұрлап, әлемдегі компания басшылары мен шенеуніктерді жүйелі түрде сатып алып отырған деп айыпталды. Сондай-ақ оған Швейцарияда орналасқан бірқатар компания мен банк шоттары арқылы заңсыз жолмен ақша жымқырды деген қылмыс қосылды.

Тергеу нәтижесінде Швейцария билігі оның активіндегі Өзбекстанға қайтарылуы керек 340 млн швейцария франкын (370 млн АҚШ доллары) тәркіледі. Тағы 440 млн франктен астам қаржыны пайдалануға тыйым салынған, әзірге тергеу жалғасып жатыр.

Каримованың швейцариялық адвокаты ол «барлық айыптауға келіспейді және өзін ақтау үшін күреседі» деп мәлімдеді.

Гүлнәр Каримоваға қатысты осыған ұқсас айып Ұлыбританияда да тағылған болатын. Ел билігі оның құны 20 млн фунт стерлингтен асатын мүлкін – Лондонның Белгравия ауданындағы екі пәтері мен Суррей графтығындағы жекежайын тәркіледі. Лондон соты бұл мүліктің бәрі қылмыстық жолмен табылған, яғни өзбек нарығына шығуға көмектесу үшін телекоммуникация компанияларынан алған параға алынды деп қорытты.

Сондай-ақ айта кетейік, бұған дейін Швейцария Гүлнәр Каримованың активтерін Өзбекстанға қайтару туралы келісімге қол қойған болатын.