АСТАНА. KAZINFORM — Кәсіби теннисшілер қауымдастығы теннисшілер қауымдастығы (ATP) жаңартқан әлемдік рейтингіде қазақстандық спортшылардың орны анықталды.
Швейцарияның Гштаад қаласында ATP 250 турнирінің жеңімпазы атанған Александр Бублик 34-тен 30-ға көтерілді.
Сөйтіп ол ТОП-30-ға қайта кірді.
Тағы бір қазақстандық Александр Шевченко 101-ден 110-ға сырғыды.
Михаил Кукушкин 197-сатыда қалса, Дмитрий Попко 214-тен 215-ке, Бейбіт Жұқаев 216-дан 218-ге төмендеді. Ал Тимофей Скатов 253-тен 309-ға, Денис Евсеев 280-нен 322-ге құлдырады.
А.Бублик пен А.Шевченко осы аптада Кицбюэль (Аустрия) ATP 250 турнирінде бақ сынайды.
Сондай-ақ Бейбіт Жұқаев Вашингтон ATP жарысының алғашқы айналымында әлемнің 39-ракеткасы, франциялық Александр Мюллермен шеберлік байқасады.
Еске сала кетейік, бұдан бұрын Бейбіт Жұқаевтың алғаш рет Вашингтон турниріне жолдама алғанын жазған едік.
Сондай-ақ Елена Рыбакина әлемдік рейтингіде 12-орынға көтерілді.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).