АСТАНА. KAZINFORM — Қазақстандық теннисші, әлемнің 101-ракеткасы Гштаад (Швейцария) ATP 250 турнирінің екінші айналымына шықты.
Қазақстандық теннисші алғашқы кездесуін «Үлкен дулыға» жарысының үш дүркін чемпионы, қазіргі кезде рейтингіде 156-орында тұрған швейцариялық Стэн Вавринкамен өткізді.
Қарсыластар осыған дейін бір рет кездесіп, онда Шевченко жеңген еді.
Бұл жолы А.Шевченко 6:3, 6:2 есебімен басым түсті.
Бір сағат 15 минутқа созылған бәсекеде Шевченко 7 эйспен бірге 6 брейк-пойнттың тең жартысын пайдаланды. Вавринка 6 эйс жасағанымен, 5 брейк-пойнтты мүлт жіберді.
А.Шевченко ширек финалға шығу үшін әлемнің 34-ші, осы доданың 2-ракеткасы, отандасы Александр Бубликпен таласады.
Өткен жылы Гштаадта италиялық Маттео Берреттини үздік шыққан еді. Биыл ол жарысқа қатыспайды.
Еске сала кетейік, бұдан бұрын Александр Бубликтің Алматы турниріне келетінін жазған едік.
Ғайсағали Сейтақ
1980 жылы А. Пушкин атындағы Орал педагогикалық институтын (М. Өтемісұлы атындағы БҚУ) қазақ тілі мен әдебиеті мамандығы бойынша бітірген. Тасқала аудандық «Екпін» газетінде тілші, бөлім меңгерушісі болды. Облыстық «Орал өңірі» газетінде тілшіліктен бас редакторлыққа дейінгі жолдан өтті. «Жайық Пресс» ЖШС бас директорының бірінші орынбасары қызметін атқарды. 2000 жылдан бері Kazinform халықаралық ақпарат агенттігінің БҚО-дағы меншікті тілшісі. Қазақстан Жазушылар және Журналистер одағының мүшесі. Республикалық «Жалын» журналы белгілеген Төлеген Айбергенов атындағы сыйлықтың (1987) және спорт журналистері арасында Сейдахмет Бердіқұлов атындағы сыйлықтың лауреаты (2015). «Ерен еңбегі үшін» медалінің иегері. Халықаралық «Алаш» әдеби сыйлығының лауреаты (2024).