Шығыс Қазақстанда орманда шыққан өрт бір күннен кейін ауыздықталды
ӨСКЕМЕН. ҚазАқпарат – Шығыс Қазақстан облысы Ұлан ауданында орманда шыққан өрт бір күннен кейін ауыздықталды, деп хабарлайды ҚазАқпарат тілшісі.
Фото: ШҚО ТЖД баспасөз қызметі
ШҚО төтенше жағдайлар департаменті баспасөз қызметінің мәліметіне сүйенсек, 1 тамыз күні Ұлан ауданы Асубұлақ орман шаруашылығы аумағындағы Белогорск орманшылығында өрт шыққан.
Қызыл жалын шөп, бұта мен ағаштарды шарпыды. Оқиға орнына жеткен орманшылар мен өрт сөндірушілер отты өшіруге кірісті. Жан-жаққа жылдам жайыла бастаған «тілсіз жаумен» күресу оңай болған жоқ.
«Бірлескен іс-қимылдың арқасында 2 тамыз сағат 19.30 шамасында жалпы ауданы 3,9 гектар өрт ауыздықталды. Өртпен күреске жеке құрамнан 28 адам және 7 техника жұмылдырылды», - делінген ақпаратта.
Өскемендегі С.Аманжолов атындағы ШҚУ-ды "Журналистика" мамандығы бойынша тәмамдаған. Еңбек жолын 2015 жылы ШҚО "Алдаспан" газетінде тілші болып бастады. ШҚО "Менің өлкем" газетінде тілші, республикалық "Жас қазақ", "Заң" газеттерінде Шығыс Қазақстан облысы бойынша меншікті тілші, ШҚО "Менің өлкем" газетінің бас редакторы қызметтерін атқарған. Kazinform агенттігінде 2021 жылдан бері жұмыс істеп келеді.