Шығыс Қазақстанда осы аптада 7 адам суға кетті
ШҚО Төтенше жағдайлар департаменті баспасөз қызметінің мәліметіне сүйенсек, өңір бойынша осы аптада 7 адам суға кеткен. Соңғы оқиға 1 маусым күні Миролюбовка ауылындағы Бұқтырма су қоймасында болды. 1997 жылғы қыз үрлемелі матраспен жағадан алысқа кетіп қалған. Абайсызда тайып кетіп суға құлаған ол, жүзіп шыға алмаған.
«Жалпы шомылу маусымы басталғалы бері облыста 12 адам суға батты. Оның ішінде 3 бала бар. Негізінен 20-40 жас аралығындағы азаматтар суға батуда. Олардың көпшілігі өз күштерін дұрыс бағаламау және мас күйде шомылу салдарынан көз жұмған. Ал балалар ата-аналардың қараусыз қалдыруынан суға кетуде», деді облыстық ТЖД бастығының міндетін атқарушы Дмитрий Титов.
Осы ретте, департамент мамандары өңір жұртшылығын арнайы жабдықталмаған жерлерде суға түсуден аулақ болуға шақырады.