23:08, 06 Ақпан 2023

Шығыс Қазақстанда тауда екі жарылыс жасалып, 5200 текше метр қар түсірілді

ӨСКЕМЕН. ҚазАқпарат – Шығыс Қазақстан облысында тауда екі жарылыс жасалып, 5200 текше метр қар түсірілді, деп хабарлайды ҚазАқпарат тілшісі.

ШҚО Төтенше жағдайлар баспасөз қызметінің мәліметіне сүйенсек, өңір аумағында жасанды жолмен қар түсірілді.

«Қар көшкінінің алдын алу шарасы «Өскемен-Алтай» тасжолының 58-66 шақырымында жүргізілді. «Қазселденқорғау» ШҚ филиалының мамандары мен ТЖД қызметкерлері тауда 2 жарылыс жасады. Соның нәтижесінде, 5200 текше метр қар түсті. Бірден жол қардан тазартылды», - делінген ақпаратта.

Жалпы көшкін қаупі бар кезең басталғалы бері Шығыс Қазақстанда барлығы 58 рет жасанды жолмен қар көшкіні жүргізіліп, 249 260 текше метр қар түсірілген.

Осы ретте, құтқарушылар өңір жұртшылығына көшкін қаупі жоғары кезеңде таулы жерлерге бармауға кеңес берді.


Фото: ТЖД
Аймақ Оқиға Шығыс Қазақстан облысы Қоғам
Талғатжан Мұхаметбекұлы
Өскемендегі С.Аманжолов атындағы ШҚУ-ды "Журналистика" мамандығы бойынша тәмамдаған. Еңбек жолын 2015 жылы ШҚО "Алдаспан" газетінде тілші болып бастады. ШҚО "Менің өлкем" газетінде тілші, республикалық "Жас қазақ", "Заң" газеттерінде Шығыс Қазақстан облысы бойынша меншікті тілші, ШҚО "Менің өлкем" газетінің бас редакторы қызметтерін атқарған. Kazinform агенттігінде 2021 жылдан бері жұмыс істеп келеді.