ӨСКЕМЕН. ҚазАқпарат – Шығыс Қазақстан облысында жасанды жолмен қар көшкіні түсірілді, деп хабарлайды ҚазАқпарат тілшісі.
ШҚО Төтенше жағдайлар департаменті баспасөз қызметінің мәліметіне сүйенсек, соңғы күндері өңірде қалың қар жауып, қатты жел соғуына байланысты «Өскемен-Серебрянск-Алтай» тасжолының 58-65 шақырымында көшкін жүру қаупі арта түскен.
«Соған байланысты «Қазселденқорғау» ШҚОФ мамандары 4 рет жарылыс жасап, 2510 текше метр қар түсірілген. Осылайша, аса қауіпті учаске қардан тазартылды», - делінген ақпаратта.
Айта кетейік, өңірде қар көшкіні қаупі бар кезең басталғалы бері 25 рет көшкін түсіру жұмыстары жүргізіліп, 19860 текше метр қар түсірілген.
Талғатжан Мұхаметбекұлы
Өскемендегі С.Аманжолов атындағы ШҚУ-ды "Журналистика" мамандығы бойынша тәмамдаған. Еңбек жолын 2015 жылы ШҚО "Алдаспан" газетінде тілші болып бастады. ШҚО "Менің өлкем" газетінде тілші, республикалық "Жас қазақ", "Заң" газеттерінде Шығыс Қазақстан облысы бойынша меншікті тілші, ШҚО "Менің өлкем" газетінің бас редакторы қызметтерін атқарған. Kazinform агенттігінде 2021 жылдан бері жұмыс істеп келеді.