ШЫМКЕНТ. ҚазАқпарат – Бірқатар БАҚ пен әлеуметтік желіде бүгін Шымкент қаласының әкімі ауысатындығы туралы ақпарат тарады. Қала әкімдігінің баспасөз қызметі ақпаратты жоққа шығарды, деп хабарлады ҚазАқпарат тілшісі.
«Бүгін бұқаралық ақпарат құралдары мен әлеуметтік желілерде Шымкент қаласы әкімінің ауысатыны туралы жалған ақпараттар жарияланып жатыр. Шымкент қаласы әкімдігінің баспасөз қызметі бұл ақпараттың шындыққа жанаспайтынын мәлімдейді. Сондай-ақ, қазір қала әкімі М. Әйтеновтің лауазымдық қызметінде екенін хабарлайды», - делінген мәлімдемеде.
Айта кетсек, бірқатар БАҚ пен әлеуметтік желіде Шымкент қаласының әкімі Мұрат Әйтеновтің бүгін қызметтен кететіндігі жайында ақпарат тарады. Тіпті, кейбір желі қолданушылары үшінші мегаполиске жаңадан тағайындалатын әкімнің аты-жөніне дейін жазып, бірге түскен суреттерін жариялап жатыр.
Қайрат Зайнишев
Шымкенттегі М.Сапарбаев атындағы ОҚГИ түлегі. Еңбек жолын «Ақиқат-Истина» газетінде тілші болып бастады. Кейіннен «Шымкент келбеті», «Оңтүстік Қазақстан» газеті мен «Ernur.kz» сайтында тілші, «Кентау шұғыласы» газетінің бас редакторы қызметтерін атқарды. Республикалық «Экспресс К» сайтының Түркістан облысындағы тілшісі болды. 2021 жылдан бастап «Kazinform» агенттігінің Түркістан облысындағы тілшісі қызметін атқаруда.