Шымкентте Абай ескерткішіне гүл шоқтары қойылды
Қалада 1995 жылы ұлы ойшылды өскелең ұрпаққа кеңінен дәріптеу мақсатында әрі Абайдың 150 жылдық мерейтойы қарсаңында саябақ алдына ескерткіші орнатылған болатын. Бұдан өзге, Шымкентте Абай Құнанбайұлының есімі берілген аудан мен даңғыл, кітапхана, мұражай, саябақ бар. Нақтырақ айтқанда, 2004 жылы «Шымкент қаласында аудандар құру туралы» Шымкент қалалық мәслихатының шешімі және әкімдік қаулысымен Абай ауданы құрылды. Аумағы 50 мың гектарға жуық жерді алатын ауданда 323 мыңға жуық тұрғын қоныстанған. Ал, ұзындығы 2 шақырымға созылатын даңғылға Абай есімі 1990 жылы берілген. Сондай-ақ, 1964 жылы құрылған қалалық орталық кітапханаға 2005 жылы ҚР Үкіметінің қаулысына сәйкес Абай есімі берілген.